martes. 25.02.2020 |
El tiempo
martes. 25.02.2020
El tiempo

A Deputación reclama medidas á Xunta para garantir os empregos en Muebles Hermida

José Tomé, en los pasillos de San Marcos. EP
José Tomé, en los pasillos de San Marcos. EP
Tamén se aprobou, co voto do PP en contra, solicitar unha unidade de ictus para o Hula

A corporación provincial aprobou por unanimidade no pleno ordinario celebrado este martes reclamar medidas á Xunta que "garantan o futuro" de Muebles Hermida, en Lourenzá, e o mantemento dos seus preto de cen postos de traballo. Tamén acordou pedir o deseño dunha política de incentivos que contribúa a manter as empresas lucenses e a captar novas industrias e instar ao Fondo de Garantía Social (Fogasa), organismo autónomo adscrito ao Ministerio de Traballo, a que axilice "o antes posible" o pago dos salarios que Muebles Hermida debe aos traballadores e traballadoras.

A proposta en apoio da empresa,  xa rexistrada dende o 26 de decembro polo Goberno provincial para o seu debate, foi transformada nunha declaración institucional que contou coa unanimidade da Corporación despois de que o PP se sumase este mesmo martes á iniciativa do Executivo do PSOE e BNG. Os populares solicitaron unha xunta de voceiros para plantexar a adhesión á proposta do Goberno, algo que este aceptou.

Os grupos provinciais amosan na declaración institucional o seu “apoio, solidariedade e compromiso cos traballadores e traballadoras de Muebles Hermida e as súas familias”, ao tempo que esperan que “o administrador concursal habilite canto antes a posibilidade de que os empregados perciban os salarios canto antes”.

UNIDADE DE ICTUS NO HULA. A Deputación de Lugo, co voto en contra do PP, demanda á Xunta de Galicia a creación dunha unidade de ictus no Hospital Lucus Augusti (Hula). Así o acordou o pleno logo da moción presentada polo PSdeG, que contou co apoio do BNG. 

“Os estudos médicos teñen demostrado que as unidades de ictus reducen as cifras de mortalidade, melloran o proceso de recuperación e diminúen a dependencia dos e das pacientes. É, ademais, unha medida custo-efectiva, xa que diminúe o tempo de estancia media dos e das pacientes”, argumentou a Deputada provincial e voceira do grupo socialista, Pilar García Porto.

Neste sentido, o PP lamentou que “o grupo provincial do PSOE na Deputación pida servizos sanitarios para o Hula que xa están en funcionamento”.

PRAGA DE ROEDORES. O pleno tamén aprobou na sesión deste martes a moción do PSdeG-PSOE, cos votos en contra do PP e a favor do BNG, para reclamar medidas urxentes contra a praga de roedores que sofre o agro lucense. Desde a pasada primavera, gandeiros e agricultores veñen alertando do incremento da presenza da coñecida como rata-toupa nas zonas altas dos concellos de Triacastela, Pedrafita, Samos, Cervantes, O Courel e As Nogais. 

Entre as medidas demandadas, a Deputación de Lugo esixirá á Xunta de Galicia un plan de loita que conte con achegas da universidade e centros de investigación, unha liña de investigación permanente para seguir a evolución da especie, habilitar axudas económicas para os afectados cun sistema de compensación por hectárea semellante ao adoptado xa noutras comunidades autónomas e tomar medidas para garantir que as explotacións afectadas pola praga non teñan impedimentos para computar para a PAC.

GALEGO. Por último, a Deputación de Lugo insta á Xunta de Galiza a derrogar o decreto para o plurilingüismo, que marca a política lingüística no ensino non universitario desde a chegada de Nuñez Feijóo ao goberno galego.

Así o recolle a moción impulsada polo BNG e aprobada este martes no pleno provincial, que dá eco ao último informe do Comité de Expertos do Consello de Europa en relación coa Carta Europea de Linguas Rexionais e Minoritarias. A proposta tivo os votos en contra do Partido Popular.

O catamarán do Miño
O deputado popular Javier Castiñeira formulou unha pregunta ao presidente da Deputación de Lugo, José Tomé, para que explicase o que "de todos é sabido que pasou co catamarán do río Miño Pelegrín I".

"Deixouse de ofrecer o servizo xa fai tempo, abandonouse e descoidouse o seu mantemento que dende o Partido Popular xa apercibiramos en numerosas ocasións acertando, desgraciadamente, sobre o prognóstico sobre o seu fatal afundimento acompañado da mala imaxe que deu a Deputación de Lugo neste sentido", lamentou.

A Deputación reclama medidas á Xunta para garantir os empregos en...
Comentarios