A deputada de Promoción Económica e Social da Deputación de Lugo, Sonsoles López Izquierdo, presentou este luns o novo servizo público de inserción laboral na provincia, que a entidade ofrece de forma gratuíta a veciños, empresas ou colectivos lucenses.
Segundo indicou, conta cunha oficina presencial no Pazo de San Marcos, onde profesionais atenderán persoalmente e de maneira individual aos interesados, ofrecendo asesoramento ás persoas que busquen traballo, ás que desexen mellorar a súa situación laboral ou ás que queiran emprender.
Tamén prestarán este servizo aos representantes de entidades ou asociacións da provincia que estean a buscar novos traballadores, orientándoos sobre os perfís que requiren.
Ademais desta oficina presencial, porase en marcha unha plataforma web na que se poderá trasladar á Deputación toda esta información. "Contaremos con dúas importantes radiografías da provincia, a da oferta e a da demanda de emprego, que poremos en común para facilitar a inserción laboral dos nosos veciños nos establecementos lucenses", destacou López Izquierdo.
O obxectivo desta 'Axencia de Colocación' é "inserir no mercado laboral da provincia aos lucenses que busquen traballo nas empresas ou entidades que estean a buscar novos traballadores", así como "contribuír á xeración de novas entidades, axudando aos emprendedores", dixo a deputada. A oficina presencial iniciará a súa actividade este xoves e estará aberta de luns a venres de 9,00 a 14,00 horas.
UN SERVIZO "MÁIS HUMANO". Trátase, dixo Sonsoles López, dun servizo "moi humano, próximo e fiable", que terá en conta a oferta e a demanda de emprego dentro da provincia.
Tanto a oficina física como a telemática permitirá ás empresas ou colectivos da provincia que necesiten traballadores "trasladar os perfís laborais que requiren ou que buscan para poder traballar ou mellorar o rendemento dos seus establecementos". Ademais de proporcionarlles candidatos, os axentes da oficina ofreceranlles asesoramento "individual e continuado", en encontros ou reunións, para definir as súas necesidades laborais.
Os veciños da provincia, pola súa banda, "poderán trasladar os seus currículos" e os axentes poranos en contacto con empresas ou colectivos que busquen perfís similares. Tamén lles ofrecerán un "asesoramento individual e continuado, en encontros ou reunións, para axudarlles a atopar emprego". Finalmente, os emprendedores contarán con asesoramento individual en todos os aspectos para a posta en marcha dos seus establecementos.
López Izquierdo lembrou que "foron centos" as empresas e veciños da provincia que "solicitaron perfís laborais e traballo a través das distintas edicións do programa Ben Empregado", unha iniciativa que se sitúa como xerme desta oficina.
