Viernes. 16.11.2018 |
El tiempo
Viernes. 16.11.2018
El tiempo

Unha cita na casa de Uxío Novoneyra

Un dos cuartos da casa de Novoneyra en Parada do Courel. AEP
Un dos cuartos da casa de Novoneyra en Parada do Courel. AEP

O Festival dos Eidos comeza o mércores a súa cuarta edición no Courel; nunha proposta que suma a aldea de Paderne como escenario e que recibirá decenas de artistas

O Festival dos Eidos chega á súa cuarta edición, neste final de agosto de 2018, cunha nova programación de marcado perfil internacional e multidisciplinar, sempre coroado pola mellor poesía e música nas súas diferentes manifestacións.

Este ano o esforzo organizativo elevará a programación a cinco días de duración. Desde o mércores ao 26, e descentralizará a mesma até catro lugares diferentes, engadindo a fermosa aldea de Paderne ao circuíto do festival, xunto aos tradicionais lugares de Seoane, Moreda e Parada. Neste último, localízase a fundación Uxío Novoneyra, espazo central.

As poetas serán Olga Novo, a arxentina Tálata Rodríguez, Teresa Moure, Olalla Cociña, Xiana Arias, Celia Parra, Nieves Neira, o italiano Marco Paone, e os irlandeses Paul Casey, Ciaran MacArtain, Michael O Callaghan, Sue Cosgrave, Katy DArcy, Rosy OReagan e Julie Goo .

Na música estará a electrónica de raíz de Baiuca, Pelomono –o proxecto spin off de Guadalupe Plata–, as Atrás Tigre, Marco Foxo, Sumrrá e Anier, acompañados por DJ como Tristón e Sergio Canay para pechar as veladas de cada noite da programación.

No teatro estarán os portugueses Teatro da Madeira e o teatro de obxectos de Fantoches Baj e, na danza, a referencia mundial Hisako Horikawa. Tamén haberá un programa de audiovisuais que farán dialogar o documentario e a poesía con Vértice de Versos, Versogramas e unha selección de videopoemas seleccionados polos irlandeses do festival Winter Warmer de Cork.

Sucederanse as xa tradicionais visitas guiadas a casa museo e de avistamento de paxaros. Integraranse novas propostas como unha visita descubrimento ao souto da Rubial, conxunto arbóreo protexido, sobre os usos tradicionais das plantas autóctonas. A visita á Ferrería histórica celebrará o Ano Europeo do Patrimonio Cultural.

Tamén haberá tempo para os profesionais ligados ao feito literario e cultural, como a do investigador Jorge Linheira, que presentará o seu novo estudo sobre políticas culturais, ou a do profesor de Princeton Germán Labrador, sobre contracultura.

O programa completarase coa homenaxe a Carlos Oroza nos seus espazos, con degustacións da gastrocultura do mar e a montaña e moitas sorpresas máis.

O Festival dos Eidos forma parte da rede europea LitFest.eu, que aglutina festivais literarios en zonas isoladas.

Unha cita na casa de Uxío Novoneyra
Comentarios