As axudas do plan Galicia Emprende, promovido pola Xunta, permitirán a implantación de catro novas empresas na provincia: dous talleres mecánicos en Lugo e Friol e dúas clínicas de odontoloxía, unha tamén na capital e a outra no Saviñao. A cantidade total achegada por este programa para estes catro proxectos é de 253.000 euros.
Segundo informou o delegado territorial do Goberno galego, José Manuel Balseiro, con esta orde de axudas convocada pola Consellería de Economía e xestionada polo Igape búscase "fomentar a implantación" de pemes, "que son determinantes no tecido produtivo e para a creación de emprego".
Ademais desta convocatoria, estanse tramitando as solicitudes da segunda orde de axudas publicada o pasado mes de xuño, e á que se presentaron unha decena de emprendedores en Lugo.
Os interesados nestas liñas poden presentar un custo subvencionable igual ou superior a 25.000 euros e non superior a 500.000, para gastos ou investimentos que deben estar localizados no centro de traballo da empresa en Galicia.
En concreto, botaron a andar cinco empresas en Lugo, tres en Chantada e unha en Monforte de Lemos, Castro de Rei e Vilalba respectivamente.