Non todos os días vai ao cole un grafiteiro premiado mundialmente. Diego As até asina autógrafos aos máis pequenos do CPIP de Castroverde. "Se lles fai ilusión, fago o que queiran", comenta, contento con ese público tan agradecido. O traballo de grafiteiro é solitario, pero os pequenos non teñen medo en interromper para preguntar moitas cousas. Tampouco os xornalistas, que estes días non paran de chamar ao teléfono.
"Estou moi agradecido de todo o que está pasando", conta con esa calma que o caracteriza. Porén, o tempo ábrese rapidamente nun dos muros do colexio. Decatámonos de que nese anaco que pasamos alí, a imaxe avanza rapidamente. O rostro da científica Hipatia de Alexandría vaise fixando de perfil, mirando o horizonte dun universo que ela viu moito máis lonxano que o seu tempo. A iniciativa de render homenaxe a esta figura foi da directora e profesora de matemáticas, Ana María Pérez Veiga. "O feminismo é un sinal de identidade do noso centro, e traballamos moito no eido das nenas na ciencia, pois aínda existe un teito de cristal para as mulleres neste ámbito", conta.
Por iso é que xa hai máis dun ano se puxera en contacto con Diego As, admirada do seu traballo. Logo de buscar financiamento en distintos lugares, e conseguilo no Concello de Castroverde, por fin o muro do cole estase abrindo coma unha ventá.
Diego As sube e baixa na grúa, colle un e outro spray, móstranos as cuadrículas necesarias para acometer traballos desta dimensións. Cada media hora baixa para ver como avanza a obra de lonxe. Na provincia ten varias intervencións en coles de Chantada e de Rábade, pero esta é a de maior dimensión, tamén pola retratada.
Hipatia de Alexandría foi unha brillante filósofa e matemática da escola neoplatónica da cidade do norte de Exipto entre os séculos IV e V. Ana Pérez destaca, como algunha das súas contribucións, o perfeccionamento dos astrolabios ou das ecuacións diofánticas. Pero, sobre todo, chama a atención sobre a tolerancia que lle deu fama, admitindo nas súas aulas alumnos de moitas relixións distintas, e tamén o seu compromiso co coñecemento, que defendeu ata as últimas consecuencias e, coma en tantos casos na historia, custoulle a vida. O día 8 de marzo celebrarase un acto aberto diante do graffiti e co Concello ao que o centro agradece o apoio. "A fin de contas, isto é para todo o pobo", comentou.