Rábade sumará este mércores un novo local á súa numerosa oferta hostaleira. Os rabadenses poderán volver visitar A Cantina, un clásico da localidade que está situado xusto a carón da estación de tren e que levaba varios anos pechado.
Situado no número 23 da Praza de España, este establecemento comezará unha nova etapa con Juan Becerro, quen iniciará, deste xeito, a súa primeira experiencia á fronte dun negocio destas características.
Segundo explica o novo xerente de A Cantina, hoxe ás sete e media da tarde, todos aqueles veciños e visitantes que se queiran achegar á inauguración do local poderán desfrutar dunha degustación de petiscos variados e tamén de tapas da cociña española e galega.
ATENCIÓN AO PÚBLICO. O horario de apertura do establecemento será de nove da mañá ata peche, de martes a domingo. O día fixado para o descanso do persoal é o luns.
Dous camareiros e unha cociñeira serán os encargados de atender a clientela. Sobre as especialidades que caracterizarán este establecemento hostaleiro, o seu propietario, Juan Becerro, asegura que, entre outras cousas, buscarán facer os mellores cachopos da contorna.
"Todos os públicos serán benvidos no noso local", comenta este emprendedor, que espera unha boa acollida dos veciños nesta reapertura do bar A Cantina.
