domingo. 25.08.2019 |
El tiempo
domingo. 25.08.2019
El tiempo

MEIRA 2009

Un nacemento para honrar unha longa historia

Procesión do Santo Encontro en Meira, no ano 2009. TEÓFILO LÓPEZ
Procesión do Santo Encontro en Meira, no ano 2009. TEÓFILO LÓPEZ

A Confraría Nosa Señora do Pedregal xurdía ao amparo da tradición relixiosa da localidade e, unha década despois, a súa creación medra cunhas fortes raíces e coa implicación de toda a comunidade

Por que?
Se hai un concello que teña unha longa tradición relixiosa, ese é o de Meira co seu pasado de esplendor cisterciense, traído ao presente coa creación dunha confraría en 2009.
Progatonista
Nosa Señora do Pedregal foi o nome escollido para bautizar a confraría. Non é casualidade. Tiñan claro que querían dedicarlla á virxe, Nosa Señora, e escolleron o ‘apelido’ de Pedregal, pola relevancia que ten o berce do Miño.
Un chisco de historia
No ano 1143 fundábase o mosteiro meirego da man do abade Vidal, monxe da orde do Císter chegado de Claraval. Entre 1185 e 1225 construíase a igrexa, consagrada hai 761 anos, un 3 de xuño, data que durante moito tempo se conmemorou coa celebración dunha feira anual, xerme da actual —un decreto real de 1707 autoriza a Meira a facela e prohíbe outra o mesmo día nun radio de 30 quilómetros—. A desamortización de Mendizábal, en 1835, supuxo o fin da comunidade monástica. En 1931, Santa María de Meira foi declarada monumento nacional.

A CONFRARÍA NOSA Señora do Pedregal de Meira suma hoxe preto de 500 confrades, unha cifra que sextuplica o número de persoas que contou a primeira reunión para crear a entidade, o xerme de todo o que despois viría e do que se dará detallada conta na publicación dunha revista con motivo do décimo aniversario, que verá a luz o vindeiro 22 de xuño.

Nesa recompilación, cobran especial importancia os primeiros pasos dados para chegar ata o día de hoxe, no que a confraría organiza non só os actos de Semana Santa, razón primixénea e fundamental da súa fundación, senón outras moitas actividades ao longo do ano, coma o belén vivinte no Nadal, as alfombras do Corpus Christi, a batukada das festas patronais ou a recuperación dos cabezudos.

O 22 de febreiro de 2009 constituíase oficialmente a Confraría Nosa Señora do Pedregal, tal e como se recolle na web Galicia Digital: "Recordamos con alegría aquela tarde, fría e case escura de domingo de feira, que esperamos nunca se borre das nosas mentes. Certo é que a cousa se botou a andar con medo, moito medo, pero pouco a pouco foi dando pequenos pasos, ata que todo se empezou a organizar, sinxelamente, pero con moita ilusión".

Menos de dous meses despois, o 10 de abril de 2009, saía a primeira procesión do Santo Encontro, a única que se organizaría naquela primeira conmemoración da morte e resurrección de Cristo e na que participarían 80 persoas.

Aquel primeiro ano, os confrades vestiron as albas do crego, dado o pouco tempo que tiveron para organizar todo, pero conseguiron sacar adiante unha procesión "pequeniña" que dende aquela non deixou de medrar, en cantidade e en calidade.

O vestiario profesionalizouse, coma quen di, e escolleuse o granate como cor identitaria da confraría, e mercouse a figura do Cristo Nazareno para acompañar a da Virxe das Dores. Cada vez son máis os participantes, no que supón unha auténtica actividade interxeracional, xa que os nenos e as nenas se poden sumar dende ben pequeniños. Abonda con que teñan tentos para suxeitar o tambor. E o programa de actividades foise ampliando, organizando o Domingo de Ramos, coa procesión da borriquiña, unha penitencia comunitaria, a tamborrada nocturna e a clásica procesión do Santo Encontro.

Nesta última Semana Santa, coincidindo co décimo aniversario, foise un paso máis alá e promoveuse unha irmandade con dúas confrarías da Pontenova que terá continuidade no tempo. De feito, representantes da Nosa Señora da Esperanza e do Cristo da Agonía acudiron esta ano á tradicional xuntanza anual da confraría, que se celebraba por primeira vez tamén en 2009, o Día das Letras Galegas, data que permaneceu inalterable no tempo e na que se aproveita para oficiar unha misa na igrexa de Santa María e para celebrar a asemblea anual da entidade.

Naquela primeira convocatoria xuntáronse no pavillón municipal máis de 200 persoas, ao ser convidados non só os confrades, senón tamén veciños e todos os que colaboraron para sentar as bases do que dez anos despois é unha confraría consolidada nun pobo xurdido ao redor da relixión e que ten a igrexa de Santa María e o seu famoso rosetón como un dos seus principais emblemas, testemuña viva dun pasado distintivo.

A rehabilitación dos retablos e da Sala das Reliquias do templo, a adhesión á Asociación de Mosteiro do Císter en Galicia (Acisal), o traballo para que se recoñeza oficialmente a Vía Rexia como un itinerario de peregrinación son outros dos pasos dados nos últimos anos dende Meira para que a localidade sexa tamén un referente cultural, social e turístico.

En 2009 tamén pasou...

Abadín 
▷ Celébranse distintos actos para conmemorar o centenario do poeta Aquilino Iglesia Alvariño, natural de Vilarente e que lle dá nome ao centro educativo da localidade.

Begonte 
▷ Un pai e o seu fillo asaltan o 17 de xaneiro a oficina do Pastor en Baamonde e son detidos, o primeiro na caixa forte e o segundo, logo dunha persecución. En maio o banco sofre outra tentativa de roubo cun butrón e en xuño é o estanco de Baamonde o que é vítima dun asalto. Levan 650 cartóns de tabaco.

Castro de Rei 
▷ En outubro deteñen a boa parte do equipo de goberno na chamada operación Rei. Sete anos máis tarde todos os procesados serían absoltos pola Audiencia Provincial.

Cospeito
▷ Inaugúranse a granxa escola Garabullos, o polideportivo de Muimenta co nome de Francisco Javier López Anllo e o concurso de tapas de Muimenta, que celebra dúas edicións (agosto e decembro).

Guitiriz
▷ Os veciños de Roca recuperan a figura da ‘veciña’ para comprarlle ao Concello a escola da parroquia. Firmouse o acordo en setembro.

Muras 
▷ Norvento organiza un simulacro de rescate na cima dun eólico do parque de Coruxeiras. 

A Pastoriza
▷ Celébranse o 20 de setembro a primeira Festa do Requeixo e o primeiro concurso de habilidades co tractor.

Vilalba
▷ O escritor Agustín Fernández Paz é homenaxeado pola AELG nas Fontiñas o 20 de xuño, tres días antes de que os Príncipes de Asturias lle entregen o Premio Nacional de Literatura Infantil y Juvenil en Teruel.

Xermade
▷ Un gandeiro de Momán aluga a súa explotación gandeira, con 115 hectáreas de terreo e máis de 180 cabezas de gando, ademais de maquinaria. Uns veciños quedan con ela.

Pol 
▷ O xogador de baloncesto Juan Carlos Navarro asiste ás festas de Santa Isabel xunto a súa familia de Gomesende. 

Ribeira de Piquín
▷ A ministra de Medio Ambiente, Elena Espinosa, realizou unha visita á piscifactoría o 21 de febreiro.

As Pontes 
▷ A Xunta impermeabiliza de urxencia os noiros da AG-64 nas Pontes ao contaminar as augas do río. 

Un nacemento para honrar unha longa historia
Comentarios