jueves. 24.09.2020 |
El tiempo
jueves. 24.09.2020
El tiempo

As mil caras de Amador Arias

Amador Arias.
Amador Arias.
Amador Arias, unha das caras máis coñecidas do panorama cinematográfico actual, non deixa de sorprender coas súas distintas facetas como artista.

Moitos coñecerán a Amador Arias como un dos protagonistas indiscutibles da película O que arde, pero a súa arte non reside unicamente no mundo da actuación. Aos seus 63 anos, o fonsagradino continúa activo cunha das súas afeccións preferidas, o debuxo. "Levo debuxando toda a vida e gústame moitísimo", explica Amador.

O actor ten colocados 16 dos seus debuxos na pensión Casa Cuartel ao subir as escaleiras deste novo albergue da Fonsagrada. "Son debuxos imaxinarios e outros tratan do cosmos", declara o fonsagradino, que se adaptou a unhas medidas concretas para os cadros do establecemento. "Estou organizando todos os debuxos que teño. Cando esta situación remate farei unha exposición no museo", di o artista en relación ao Covid-19.

A súa inspiración reside na súa propia mente e nas experiencias da xente que lle rodea. "Penso no cosmos ou nos problemas socias. Todo forma parte da imaxinación en realidade", declara. O garda forestal teno claro, el prefire debuxar antes que actuar, aínda que non pecha ningunha porta. "Se teño que actuar nun filme como O que arde non hai problema porque o pasei moi ben, pero non me vexo actuando en series", manifesta o artista.

Despois da estrea da película en 2019, Amador convertiuse nunha das caras máis recoñecidas do sétimo arte, pero el recoñece que "é moi bonito escoitar a xente falarche do filme", di o fonsagradino. "Agora non podo saír a ningún sitio sen que me recoñezan pero paga a pena. A xente sempre pide algunha aclaración ou fai algún comentario sobre ela", explica Amador.

Dende entón, a súa relación co director da película, Oliver Laxe, non fixo máis que despegar. "Somos moi amigos. Aínda estivemos onte en Navia comendo o polbo", conta o actor, que está a colaborar nun proxecto no que se van divulgar algúns dos filmes galegos máis prestixiosos de todos os tempos por 76 concellos galegos, tales como Sempre Xonxa (1989), O que arde(2019) ou o próximo largometraxe de Ignacio Vilar, María Solinha (2020). Amador Arias di estar moi agradecido polo recoñecemento que está a ter e polas oportunidades que se lle presentan.

"Aínda me chamaron hai tres días para un papel como actor pero díxenlles que non pola situación que estamos a vivir", sostén o debuxante, que xa tivo que cancelar algún proxecto por causa da pandemia. "Ata que pase todo eu non penso moverme para nada", di convencido. "A vida é algo que hai que desfrutar. Non é só traballar, traballar e traballar. Tamén terei que descansar algo", di o fonsagradino con retranca.

Porén, Amador descansa pouco porque ademais das súas facetas como debuxante e actor, o artista tamén está a escribir dous libros sobre pequenas historias e relatos de dous ou tres folios cada unha. "Podería compararse con algo semellante ao libro de Tic-Tac (1993) de Suso de Toro", declara o veciño da Fonsagrada.

Pensabamos que xa viramos todo o potencial de Amador Arias cando o desfrutamos na gran pantalla da man de Oliver Laxe, pero o fonsagradino é un auténtico artista polifacético. Actor, debuxante e escritor. Toda unha caixa de sorpresas da que estaremos atentos proximamente.

As mil caras de Amador Arias
Comentarios