sábado. 24.07.2021 |
El tiempo
sábado. 24.07.2021
El tiempo

O desenvolvemento rural e o silvopastoreo, a debate na Casa Quindós de Oliver Laxe

Presentación das xornadas nos xardíns de San Marcos. VICTORIA RODRÍGUEZ
Presentación das xornadas nos xardíns de San Marcos. VICTORIA RODRÍGUEZ
As xornadas, organizadas pola Deputación coa colaboración da USC, a asociación SER e a SGPF, celebraranse do 25 ao 27 de xuño en Vilela

O centro de dinamización rural e cultural que Oliver Laxe impulsou na aldea naviega de Vilela, a Casa Quindós, acollerá os días 25 e 26 de xuño as primeiras Xornadas de Silvopastoreo e Desenvolvemento Rural, e o día 27, a VI Reunión de Primavera da Sociedade Galega de Pastos e Forraxes (SGPF). O evento foi presentado onte nos xardíns do Pazo de San Marcos pola deputada de medio rural, Mónica Freire, á fronte da área provincial organizadora do evento, e polos representantes das entidades colaboradoras: Monserrat Valcárcel, vicerreitora da USC en Lugo; Joan Alibés, presidente da SGPF, e o mesmo Oliver Laxe, da Asociación SER.

Os relatorios comezarán o día 25 cunha mesa moderada por Mar Pérez Fra, catedrática de Economía Aplicada na Escola Politécnica Superior. Participarán nela Pablo Iglesias, xefe do Servizo de Explotacións Agrarias de Lugo; Xosé Luís Reza, do programa de apoio a empresas agroalimentarias da Fundación Juana de Vega, e Manuel Redondo, da Red Terrae. Na mesma mañá Joan Alibés presentará a Neus Monllor, consultora da Red de Espacios Test Agrarios. Pola tarde, Laxe intruducirá as intervencións de Fernando García Dory, creador do proxecto INLAND, que vencella artes e territorio, e Alberto Uría, de El País del Abeyeiro, en Negueira de Muñiz.

EXPERIENCIAS LOCAIS. A creadora de Leiras e Marcos, Laura Pardeiro, moderará unha mesa sobre novos veciños e iniciativas na Montaña, na que participarán Pascal Encinga, permacultor; David de Poso, gandeiro da Carqueixa; Hugo Santín, de Melosa; Silvia Saavedra, da casa niño Argalleiros; Héctor e José Álvarez, viticultores de Coea; Manuel Gutiérrez e Mireia Rodríguez, produtores da cervexa Colmo, e Ana Pérez, publicista dende Pontes de Gatín. A xornada do 25 rematará cunha presentación dos proxectos da Casa Quindós.

O sábado 26 Eloi Villaga, fundador da SGPG, presentará o relatorio de Jaime Izquierdo, integrante do comisionado para o reto demográfico en Asturias. A continuación, Juan Alibés moderará unha mesa cos alcaldes da Veiga e Somiedo, e co técnico de medio ambiente de Allariz. Despois do xantar, Román Sánchez Besteiro, xerente de A Carqueixa, presentará a participación de Fe Álvarez, xerente do GDR3 Montes e Vales Orientais, e el mesmo será presentado por Laxe para expoñer a iniciativa de O Sabor dos Ancares. A xornada finalizará cunha demostración de maquinaria agrícola de montaña, á que seguirá un concerto de Davide Salvado e Fransy González.

O domingo 27 a reunión da SGPF leva por título "O cabrún como alternativa de aproveitamento do monte nos Ancares". Rosa Mosquera, catedrática da USC especialista en silvopastoreo, será a encargada de inaugurar unha xornada que contará coa participación doutros especialistas e pastores, e que rematará con visitas a granxas da zona.

Freire vencellou estas xornadas ao plan de prevención de incendios provincial O que non arde. "A ordenación do territorio é un piar fundamental para un rural vivo", indicou. Pola súa banda, Laxe celebrou un programa que parte do seu "compromiso co sector primario" e a partir dun encontro entre a "mirada especializada" e as "experiencias produtivas locais". Alibés defendeu un "debate importante nun momento no que temos necesidade de gando nos montes". Valcárcel confirmou "o compromiso dun Campus Terra que, coma o seu nome indica, está apegado ao territorio", e anunciou que "esta será a primeira das colaboracións co proxecto de Laxe".

O desenvolvemento rural e o silvopastoreo, a debate na Casa Quindós...
Comentarios