miércoles. 16.06.2021 |
El tiempo
miércoles. 16.06.2021
El tiempo

Arrancan as obras de teitado da palloza museo do Cebreiro

Obras do teitado do Museo no Cebreiro. EP
Obras do teitado do Museo no Cebreiro. EP
Con esta intervención quedarán restauradas as catro edificacións do conxunto etnográfico

A palloza museo do Cebreiro vestirá un novo teito tradicional feito con mollos de centeo. As obras para restaurar a cuberta tradicional desta edificación comezaron a semana pasada, e con elas se completará a rehabilitación das catro pallozas que conforman o conxunto etnográfico desta aldea, que a Consellería de Cultura e Turismo puxo en marcha en xuño.

A restauración da palloza museo é a máis complexa do conxunto. Nas outras tres -Quico, Campelo e Galán- aproveitáronse as madeiras e incluso as partes de centeo en bo estado, pero a do museo require levantar non só o centeo, senón tamén os cangos e as ripias que conforman a estrutura de madeira que os soporta, polo que os traballos se demorarán ata mediados do mes que vén, se o tempo acompaña. Iso si, unha vez rematados, o centeo aguantará as invernías rigorosas deste lugar coas súas propiedades impermeables.

Ademais, o traballo de teitado é totalmente artesán. Unha navalla e unha paleta de freixo son as únicas ferramentas das que dispoñen os teitadores, un oficio tan escaso coma prezado.

Neste caso, o traballo de restauración foi adxudicado á empresa Resconsa por un total de 161.000 euros, que inclúe as intervencións nas catro edificacións. As actuacións tamén inclúen a substitución ou reparación de lousas nos accesos, a mellora das instalacións de electricidade e a aplicación de tratamentos para evitar os ataques de insectos xilófagos, algo que é necesario actualmente ante a falta de fume que as mantiña en mellor conservación cando estaban habitadas.

Esta palloza museo, que conta con 300 metros cadrados, ofrece aos visitantes un panorama de como era a vida no interior destas casas cuxa estrutura se remonta ao Neolítico e que estiveron poboadas nos Ancares até ben entrada a década dos 70. Ademais, o conxunto etnográfico do Cebreiro está recoñecido como Ben de Interese Cultural, por onde entra en Galicia o Camiño Francés.

Arrancan as obras de teitado da palloza museo do Cebreiro
Comentarios