A Dirección Xeral de Patrimonio Natural contará con persoal de apoio na praia das Catedrais, en Ribadeo, para realizar labores informativos e de vixilancia nos accesos ao monumento natural durante as pontes do 1 e 17 de maio.
Así o avanzou este mércores a conselleira de Medio Ambiente, Beatriz Mato, durante a súa intervención no Parlamento para informar as actuacións impulsadas pola Xunta na zona tras o accidente do pasado 31 de marzo que lle custou a vida a unha moza.
Ademais, Mato informou de que espera contar a finais do presente deste mes, "nos próximos días", cun documento preliminar "terminado" do informe xeotécnico que solicitou á Universidade da Coruña sobre a praia. Indicou que cando conte con este informe preliminar do colexio de enxeñeiros, que se suma a outro encargado en setembro a un catedrático, as tres administracións competentes poderán "volver" reunirse e "cada unha" en función das súas competencias "tomar distintas medidas, con rigor".
A conselleira subliñou que as competencias de Medio Ambiente "exclusivamente" céntranse na protección da natureza, pero apostou por "esforzarse" para que sexa un lugar de visita "que sexa seguro", e lembrou medidas de "reforzo" dos avisos sobre os riscos adoptadas nas últimas semanas.
Rodil: As perdas persoais son irreparables, pero este accidente ten que servir para reflexionar, para analizar a protección e a conservación que se está desenvolvendo deste espazo
Pola súa banda, a deputada do BNG Olalla Rodil reclamou á Xunta colaboración entre administracións para poder aprobar este mesmo ano o Plan especial de protección das Catedrais.
"As perdas persoais son irreparables, pero este accidente ten que servir para reflexionar, para analizar a xestión, a planificación, a protección e a conservación que se está desenvolvendo deste espazo" e determinar as medidas a adoptar.
Entre as peticións ao Executivo, Rodil demandou que sexa a Xunta quen ordene o tráfico cun novo aparcadoiro, que fomente o transporte colectivo e público, o autobús e o Feve, que cree un centro de visitantes no que informar e sensibilizar aos turistas ao redor do espazo que van visitar, dos riscos e das precaucións que se deben adoptar.
