O alcalde, o nacionalista Fernando Suárez Barcia, publicou un bando para advertir aos ribadenses de que hai operarios dunha empresa que estes días pedirán á súa colaboración, porta á porta, para repasar a numeración de vivendas e de edificios de todo o termo municipal e, se fose necesario, cambiar os números para evitar duplicidades. Tódolos cambios vanse expoñer ao público unha vez finalizada a actualización da base de datos definitiva.
O investimento co que se realizan estes traballos ascende a 9.000 euros que sufraga o Concello.
"Hai que actualizar a numeración das vivendas e dos edificios, fixando para cada un o número que lle corresponde exactamente", clarexa o alcalde. "Vai ser precisa a renumeración naquelas vías que, pola existencia de duplicidades ou outras casuísticas, presentan hoxendía problemas para que lles cheguen as cartas", matiza.
O problema débese a dous motivos principalmente: "Por unha banda, a última revisión da numeración que se fixo foi no ano 1996, hai máis de vinte anos e, por outra banda, o servizo estatal de Correos e Telégrafos ten establecida unha práctica institucional coa que calquera carta ou envío que adoeza dunha incorrecta dirección postal, é devolta sen contemplacións", subliña Suárez.
Correos ten que dispór dun dato exacto co nome da rúa e do inmoble, como é lóxico. En Ribadeo, debido ao bautizo de novas rúas nos últimos anos e a creación doutras, entre outros motivos, hai problemas para a recepción de envíos postais.
O Concello licitou e adxudicou hai un tempo este traballo a unha empresa que, como apostilla o alcalde, "ten avanzado moito, pero agora está facendo un traballo de campo", comprobando sobre o terreo que toda a súa base de datos estea correcta.
O persoal desta empresa vai percorrer, tanto as parroquias ribadenses, coma o casco urbán, polo que o alcalde solicita da cidadanía a máxima colaboración para con eles.
"Este persoal pode ir a moitas vivendas de Ribadeo, acreditárase convintemente e pedímoslle á poboación a máxima cooperación", incide o rexedor, quen confía en que sexan poucos os números que teñan que cambiar para evitar duplicidades ou outro tipo de problemas, comocos que se está a atopar o servizo de Correos.