O Resurrection Fest pon á venda ás once da mañá deste luns as primeiras entradas para o festival de xullo do próximo ano, no que confirmou bandas como Parkway Drive. A venda realízase online, exclusivamente a través da súa web tickets.resurrectionfest.es e a oferta supera en moito os abonos dos primeiros lanzamentos de pases noutras edicións. Os prezos tamén soben lixeiramente.
Na primeira quenda de 4.500 abonos, a máis barata, os de tres días cobraranse a 95 euros máis gastos (o deste ano custaba 89 euros máis gastos en setembro de 2017), o de 4 días 103 euros máis gastos (97 euros na pasada edición). Na versión Pandemonium (VIP) do billete de tres días o prezo de lanzamento son 165 euros máis gastos (160 a última edición) e 175 para os catro días, incluíndo a festa de benvida (168 euros en setembro de 2017).
Desde a organización do festival sinalan que, polo momento, non se venderán entradas soltas para a festa de presentación e como sempre, todas estas entradas inclúen cámping (aínda que non os de pago) para os asistentes.
Os organizadores indican que "tras escoitar os comentarios do ano pasado, decidimos aumentar o número de entradas por cada oferta". De feito, na segunda tamén pon a disposición outros 4.500 abonos (2.000 o pasado ano) a prezos de 105 euros máis gastos o de 3 días, 113 euros máis gastos o de 4 días e 175 e 183 euros os correspondentes á zona Pandemonium para 3 e 4 días.
Segundo se vaian esgotando (nos últimos anos as dúas primeiras acabáronse no mesmo día) por internet lanzarase incluso outra oferta de 3.000 abonos con prezos de 115 euros máis gastos os tres días, 123 euros máis gastos os catro días e 185 e 193 euros as entradas de Pandemonium.
Os pases para o Resucamp, Beachcam, Glamping, Warm-up "lockers" e viaxes organizadas sairán máis adiante. Un segundo anuncio de bandas farase proximamente para unirse a Parkway Drive, Trivium, Testament, Kvelertak e While She Sleeps.
CAUDAL FEST EN LUGO. Por outra banda, a organización do Caudal Fest, que será os próximos venres e sábado no xardín do Pazo de Feiras e Congresos de Lugo, contará o sábado con Vetusta Morla, Iván Ferreiro, Mala Rodríguez, Nivedades Carminha, Triángulo de Amor Bizarro ou De Pedro.
