As obras de ampliación do Hospital da Mariña, en Burela volven estar en marcha despois de permanecer paradas nas últimas dúas semanas. Así o comunicaron este martes dende a Consellería de Infraestruturas e Mobilidade, dende onde tamén precisaron que para retomar a actividade, "independizouse o tránsito da obra das circulacións de persoal e pacientes do hospital".
Nesta actuación, a meirande parte dos traballos xa están rematados e en servizo, coma a área de hospitalización e rehabilitacion. Só resta unha parte da reforma interior, especialmente a tocante ao servizo de diálise.
Prevese que os traballos estén rematados antes do verán.