O candidato do Partido Popular ao Congreso por Lugo, Jaime de Olano, asegurou este martes que o presidente do Goberno, Pedro Sánchez, está "a escribir as primeiras liñas do epitafio de Alcoa en San Cibrao" e, ademais, que o está facendo co "silencio cómplice do PSOE na provincia de Lugo e en Galicia".
De Olano fixo estas declaracións en Cervo, onde viaxou este martes, en compañía do candidato ao Senado, José Manuel Barreiro, e outros membros do Partido Popular provincial para reunirse cos representantes do comité de empresa da factoría que a multinacional Alcoa ten en San Cibrao.
As decisións de Sánchez en materia enerxética unicamente beneficiaron a cataláns e vascos
"Non podemos fiarnos deste presidente", engadiu á prensa, porque "ten por costume non dicir a verdade", pero "tampouco debemos fiarnos do que poida ocorrer despois das eleccións se gaña, porque moito nos tememos que podería certificarse a defunción de Alcoa na Mariña, condenando a esta comarca ao desemprego e á depresión".
Insistiu en que o borrador de estatuto para regular o marco das empresas electrointensivas "non só non soluciona nada, senón que enche de dúbidas a todos os implicados: empresa, traballadores, provedores e consumidores". "As decisións de Sánchez en materia enerxética unicamente beneficiaron a cataláns e vascos, pero prexudicaron gravemente aos demais españois", resolveu.
EN COMÚN PODEMOS. Yolanda Díaz, a número un pola provincia de Pontevedra de En Común Podemos, a marca galega de Unidas Podemos, reivindicou este martes unha mobilización dos galegos para "rescatar" a Alcoa nas eleccións xerais do próximo 28 de abril.
"Estas eleccións van ser transcendentais para o futuro do noso país", subliñou Díaz en declaracións aos xornalistas, tras reprochar a PSOE, PP e poderes económicos que "impiden" practicar políticas relacionadas co rescate dos sectores produtivos.
Díaz presentou as alegacións de En Común ao estatuto das electrointensivas, e na súa opinión, a estas alturas, "queda claro unha primeira mensaxe: o PSOE non vai rescatar Alcoa, vai deixar caer aos traballadores e familias" desta empresa.
A preguntas dos medios antes de participar nun acto en Vigo, afirmou que o "futuro" da empresa pasa por conseguir un "prezo competitivo" dos seus produtos a través dun descenso do custo do seu consumo enerxético.
Ademais, asegurou que o Goberno central ten que garantir que Alcoa se poida presentar á poxa de interrumpibilidade que se celebrará en xuño. "Hai marxe para que o Goberno poida actuar e se poida dar esa solución", insistiu Conde a preguntas dos xornalistas.
Desde a Xunta aseguraron que teñen que rectificar e ter "sensibilidade" xa que nestes momentos "non permiten que Alcoa poida acceder a un prezo competitivo xa que o seu futuro depende diso". Conde lembrou, ao ser preguntado pola prensa con motivo da súa presenza nun acto en Vigo, que a Comisión Europea está a marcar "un marco de concorrencia nas poxas, que se están cumprindo". Por iso, pediu que se busquen as formas para que sexa compatible co marco europeo.
Desde a Xunta de Galicia aseguraron que as propostas que "temos" son homologables a países da Unión Europea que "están a dar axudas para garantir as empresas electrointensivas". Neste sentido, insistiu en que España "pode e debe" competir en igualdade de condicións con Italia ou Francia "onde hai prezos competitivos".
Nas alegacións presentadas pola Xunta ao Estatuto Electrointensivo, lembrou a necesidade de que haxa unha categorización deste tipo de empresas, reducir a fiscalidade ou incrementar os mecanismos de compensación de CO2. "Son alegacións realistas que deberán permitir que o Goberno sexa sensible á industria electrointensiva e que a súa política enerxética garanta a viabilidade destas industrias", subliñou. Para finalizar asegurou que se está pondo en perigo outras empresas como Ferroatlántica ou Alcoa en San Cibrao.
