As candidaturas do BNG en Xove, Cervo e Barreiros denunciaron nas últimas horas o bloqueo das súas contas en Facebook tras recibir "denuncias falsas".
O candidato nacionalista á alcaldía de Xove, Xosé Hermida, explicou que, ao longo desta semana, persoas afíns ao PP presentaron denuncias falsas ante Facebook para que a páxina do BNG de Xove fose cancelada por "contido inadecuado, igual que se estiveran a publicar pornografía, cando o único que facemos é espir as falsidades do PP e explicar as nosas propostas do programa electoral".
Pola súa parte, Diego Fernández, candidato do Bloque en Cervo, tamén denunciou que a súa páxina de Facebook foi bloqueada e xestiona recuperala. "Os avisos que Facebook recibiu por parte de particulares polo noso suposto uso fraudulento da rede forman parte dun ataque deliberado para silenciarnos e facernos dano", di.
Dende o BNG defende a importancia das redes sociais pois "este modo de comunicarse contrasta coa petulancia e insolencia doutras formacións como o PP de Cervo que recentemente repartiu en todas as casas do municipio un boletín propagandístico".
Tamén o Bloque de Barreiros tivo que sufrir o bloqueo da súa conta nesta rede social. "A nosa páxina volve estar en activo tras non poder facer uso dela por denuncias masivas", apuntaron desde a candidatura tras lograr reactivar o perfil o pasado 14 de maio.
