domingo. 15.09.2019 |
El tiempo
domingo. 15.09.2019
El tiempo

Mario Pillado repite como candidato do Bloque en Burela

Mario Pillado. AMA
Mario Pillado. AMA

Di que Llano non foi quen de peonalizar rúas, regular o mercado, sacar adiante a Edar ou construír un novo polideportivo

O burelés Mario Pillado Mon voltará a ser o candidato á alcaldía do Bloque Nacionalista Galego nas eleccións municipais do vindeiro 26 de maio. A súa formación indica que optaron por darlle continuidade ao seu proxecto porque "Pillado liderou o traballo de oposición ao goberno do PSOE desde o minuto cero da lexislatura, ante un PP carente de ideas e máis preocupado polas liortas internas que polos problemas dos veciños e veciñas".

Engaden que o seu foi o grupo que trasladou aos plenos os asuntos que realmente preocupan á veciñanza e "Pillado demostrou que é unha persoa na que se pode confiar e que está sobradamente capacitado para levar a cabo un traballo serio e responsábel".

O candidato nacionalista, pola súa banda, amósase moi ilusionado e loitará por situar ao BNG á fronte do Concello. Di que ve posibilidade de situar o seu grupo á fronte do goberno municipal e que por iso "saímos a gañar avalados por estes catro anos de traballo desde a oposición ao goberno do PSOE, que foi incapaz de levar a cabo ningunha das súas propostas".

Concretamente, Mario Pillado lembra que o goberno municipal que encabeza o socialista Alfredo Llano non puido sacar adiante cuestións nas que se tiña comprometido como por exemplo a peonalización de rúas, a regulación do mercado semanal ou a construción dunha nova depuradora.

Tamén lembra que os socialistas se comprometeron a construír un novo pavillón polideportivo e "non se fixo nada, malia que Alfredo Llano se comprometeu a iso en repetidas ocasións".

IRRESPONSABILIDADE. Baixo o seu punto de vista durante os últimos catro anos o goberno municipal burelés estivo en mans "dun alcalde irresponsáble, que gobernou sen rumbo malia dispor de maioría absoluta e que demostrou que só buscaba a foto e o titular. Llano non é de fiar, sen esquecermos que semella estar máis preocupado en buscar asento no Senado madrileño que en solucionar os problemas da veciñanza de Burela", conclúe Pillado.

Mario Pillado repite como candidato do Bloque en Burela
Comentarios