Un incendio arrasou por completo este xoves unha palleira no concello lugués de Ribadeo. Ningunha persoa resultou ferida, pero si arderon diversos aveños e un vehículo que se gardaban no seu interior.
O lume comezou ás 1.30 horas desta madrugada, cando o 112 Galicia recibiu a chamada dunha persoa particular que solicitaba axuda por mor dun alpendre que estaba arder no lugar de Reme de Arriba.
Así, desde o 112 Galicia, informouse aos axentes da Garda Civil, os voluntarios de Protección Civil da localidade e aos Bombeiros de Barreiros para atallar as lapas do galpón.
Rematadas as tarefas de extinción, os bombeiros comunicaban ao 112 Galicia que, finalmente, ardera por completo o interior do alpendre xunto con diversos apeiros e un vehículo que se atopaban no interior.
