O plató do Quen anda aí? da Televisión de Galicia acolleu esta semana unha emotiva homenaxe ao profesor do Ies Perdouro de Burela Bernardo Penabade.
O docente acudiu enganado ao programa e alí foi sorprendido pola súa compañeira de instituto Karina Parga e por cinco exalumnos aos que influíu enormemente durante a súa etapa académica.
No plató tamén se reencontrou con outro alumno moi especial: Roberto Vilar, ao que deu clase no instituto no curso 1989/1990 e para quen Penabade foi unha figura determinante.
🚪❓ Que sería de nós sen os bos mestres? 🧑🏫 Onte inauguramos no @quenandaai_TVG o espazo #QueridoMestre e tivemos connosco a Bernardo, o profesor que apoiou a @RobertoVilarTV na súa andaina audiovisual ❤👉 https://t.co/Op21p9qe2o #QuenAndaAí pic.twitter.com/862B6QiOvJ
— TVG (@TVGalicia) September 6, 2022
"Este home creu en min", declarou emocionado o humorista xovense. "Falou coa xente, moveume, díxome 'métete aquí, empeza na televisión'. Se el non fai iso nese momento, eu non tería disfrutado deste medio que é a televisión", explicou Vilar.
O presentador mariñán confesou que Penabade foi "a persoa do mundo, despois de meus pais, que máis me cambiou a vida". "Todo é grazas a el porque como mestre fixo algo que para min é esencial: creer e mostrar confianza nos teus alumnos", concluíu o humorista.
"Bernardo é ese padriño que non elixiron os pais"
Entre os exalumnos que recibiron ao mestre no Quen anda aí? atopábase Noé, que defendeu que Bernardo é para el "coma ese padriño que non elixiron os pais". "Foi o condutor do volante da miña vida", asegurou o mozo.
Penabade tamén foi un referente para a burelá Laura Ramos, que "seguiu o seu ronsel" e agora é profesora de Lingua Galega; e para Edilson, que grazas a el aprendeu galego e sacou a bacharelato.