Candidato do PP en Foz
Lugar de nacemento: Foz.
Primeiro ano como candidata: 2011.
Afeccións: Estar coa familia, tomar café cos amigos, a cociña, o Entroido e o depor te en xeral.
O candidato do Partido Popular á alcaldía de Foz, Javier Jorge Castiñeira, ten 48 anos está casado e ten dous fillos. É arquitecto técnico e defínese como unha persoa moi familiar, que gusta de tomar o café cos amigos, e afeccionado á cociña e ao deporte en xeral. É un apaixonado do Entroido. Cunha ampla experiencia política, con máis tempo á fronte do goberno local que na oposición, Castiñeira, actual portavoz do PP na Deputación, enfronta o reto de encabezar de novo a lista popular en Foz para as próximas eleccións municipais, coa mesma humildade que na primeira ocasión e aínda con máis ilusión por servir aos seus veciños que a primeira vez. Se é alcalde garante "máis seguridade e compromiso cos mozos e a xente maior, que son os que máis apoio necesitan e aos que máis abandonou o bipartito".
Laboralmente, tras rematar a carreira, pasou 12 anos traballando na empresa privada. Despois recibiu a chamada do Partido Popular de Foz, no 2011, para presentarse como candidato, responsabilidade que asumiu con satisfacción, porque —di— sempre tivo vocación de servicio público. Dende aquela, asumiu a alcaldía durante dúas lexislaturas. Explica que "foron moi complexas pola situación económica do Concello, con débedas e orzamentos insuficientes que se conseguiron salvar gracias á boa xestión, rigorosa e valente". Pese a todo, neses difíciles anos, "non se deixaron de lado os proxectos de futuro que tiñamos para Foz: unha nova residencia, orde urbanístico e modernización no núcleo urbano, mellora das instalacións deportivas e náuticas, dos colexios e garderías públicas, dos accesos ás parroquias, e a potenciación turística de Foz e as súas tradicións". Traballou, cos seus compañeiros, "encantados de aproveitar as sinerxias e centralidade xeográfica entre Foz e A Mariña". E todo elo foi "conseguido cun goberno en minoría, grazas á confianza no equipo de goberno, nos entes sociais do concello, á negociación cos grupos municipais e ao respecto institucional coas administracións que debían participar no financiamento de todos eses investimentos".
Castiñeira di que "os 8 anos de alcalde foron unha fonte de coñecemento fundamental ", que se suma á experiencia na empresa privada e os 4 anos percorrendo a provincia como deputado provincial. Toda esta bagaxe e "o ánimo e apoio dos veciños lévanme —di Castiñeira— a volver a presentarme como candidato á alcaldía ". Ten claro que "o bipartito PSOE e BNG en Foz non funcionou; nin houbo conexión entre eles nin houbo conexión cos veciños: dimisións, monogoberno e a desconfianza e a deixamento levaron a Foz a unha situación que me preocupa enormemente". Castiñeira asegura: "Teño o mesmo compromiso e a mesma ilusión ou máis que no 2011, porque me gustan os retos difíciles, e non cabe dúbida que este o será". Asume o reto dende a humildade: "Aprendemos moito no goberno, pero tamén nestes catro anos de oposición nos que o noso obxectivo foi servir a Foz e controlar a un goberno demasiado extenso, pero pouco eficaz; os exemplos son claros: o problema da residencia, a falta de apoio ás empresas na pandemia, problemas na Escola de Música, falta de apoio ás asociacións, problemas administrativos, etcétera".
Mellora dos servizos públicos
O candidato popular di: "Se eu fose alcalde, a próxima lexislatura será a da mellora dos servizos públicos, que nalgúns casos son moi deficientes, como ocorre coa limpeza, a recollida de lixo e a xardineiría ". Indica que haberá que incorporar a nova depuradora e un novo contrato de abastecemento, así como conseguir un alumeado público máis eficiente.
Para Javier Castiñeira, "é necesario aumentar as prazas na Residencia en Foz, resolver a falta dun auditorio municipal, ampliar a Escola de Música e a actividade cultural, aproveitando o gran movemento asociativo e de peñas que se vive no concello". Cre necesario renovar as instalacións deportivas, incluído Portochico, e darlle vitalidade ao polígono. Nestes 4 anos —di— as grandes obras estiveron paralizadas polo deixamento e a falta de respecto institucional dos gobernantes. "É necesario que o goberno de España comece a obra do corredor, parado nestes 4 anos, e que a Xunta, a Deputación e o propio Concello invistan en estradas e melloras de servizos no rural". Para iso, sinala o candidato popular, "Foz debe ter máis presenza na vida pública da que ten actualmente".
Goberno unido e eficaz
"Se eu son alcalde, prometo un goberno unido, con xente preparada que coñece a vida pública", asegura o aspirante popular á alcaldía, que tamén destaca que "é importante incorporar xente nova, pero tamén xente que veña aprendida". En todo caso, non poden ser persoas "que boten 4 anos de lexislatura a velas vir, como pasou nesta".
Castiñeira sinala: "Foz ten moita marxe de mellora, pero si nos quedamos atrancados tamén pode seguir empeorando e iso non pode ser unha opción; a opción é a seguridade e as certezas que a día de hoxe só pode dar o Partido Popular de Foz".
Indica que se é alcalde tramitará "o Plan de Reforma Interior do casco antigo, que o alcalde socialista ten abandonado despois de que o goberno popular aprobase o primeiro Plan Xeral de Ordenación Municipal de Foz no 2018". "Creo fundamental —di Castiñeira— transformar as dúas entradas de Foz, especialmente dende Vilaxoane, porque é perigosa e pouco funcional".
Javier Castiñeira resume así o que serán os seus grandes obxectivos se os veciños de Foz deciden que sexa o próximo alcalde: "En definitiva, máis e mellores servizos públicos, máis dinamismo económico e social, máis seguridade e compromiso cos mozos e a xente maior que son os que máis apoio necesitan, e aos que máis abandonou o bipartito".
Un necesario plan de dinamización económica