Domingo. 18.11.2018 |
El tiempo
Domingo. 18.11.2018
El tiempo

"Formar parte dun equipo de goberno permíteche coñecer novas realidades"

Alfredo Fernández, diante do consistorio de Cervo. JOSÉ Mª ÁLVEZ
Alfredo Fernández, diante do consistorio de Cervo. JOSÉ Mª ÁLVEZ

Alfredo Fernández foi o último concelleiro en entrar no goberno local de Cervo e fíxoo para ocuparse dun área nova, a de réxime interno e patrimonio

A súa vida está vinculada á política e ao Partido Popular dende practicamente sempre. Vencellado a diversos colectivos culturais e deportivos, Alfredo Fernández (Holanda, 1972) chegou á Corporación de Cervo en xaneiro do ano pasado para facerse cargo da concellaría de réxime interior e de patrimonio nun momento clave no que o equipo de goberno mantén unha forte aposta pola posta en valor do conxunto histórico de Sargadelos.

Chegou ao goberno facéndose cargo dunha concellaría nova e cun peso determinante neste momento na política local.
O alcalde quería potenciar todo o vinculado co patrimonio e a min pareceume interesante porque me permite aprender de moitos temas e coñecer boa parte do concello. A posta en valor de Sargadelos é unha das apostas máis importantes do equipo de goberno neste ámbito, pero tampouco deixamos de lado outras como a posta en valor do castro da Atalaia, en San Cibrao do que imos recuperar o material que se poda ou a colaboración con proxectos que sirvan para recuperar o patrimonio inmaterial, como o traballo que fixo Paco Piñeiro polo centenario das escolas vellas de Cervo.

Din que a política que lle gusta é a da rúa.
Si, a min gústame estar en contacto con moita xente e ese contacto directo é a parte que máis me agrada da actividade política. Sempre estiven enredado en directivas, por exemplo no equipo de balonmán de Burela e no de Viveiro, en grupos folclóricos ou en asociacións culturais, como Amigos da Maruxaina. Disfruto relacionándome con xente e procurando axudarlle naquilo que podo.

"Gústame estar en contacto con  moita xente e esa política de rúa é a que máis disfruto"

O seu vencello coa política vén de vello.
Dende os 18 anos xa estiven involucrado co partido e fun nas listas electorais. Sempre formei parte das candidaturas do PP, pero sempre ía da metade para abaixo da lista porque me resultaría moi dificil compatibilizar o meu traballo co de concelleiro se chegaba a saír elixido. Agora a miña situación laboral cambiou e resúltame máis sinxelo, aínda que contando claro coa necesaria axuda da muller e dos fillos.

Sendo tan novo, por que se decidiu a entrar en política?
É defecto do animal. Meus pais son de San Cibrao, emigraron a Holanda e sempre falaban moito daquí e cando voltaron meu pai meteuse na asociación de veciños e miña nai tamén formou unha candidatura independente. Na casa sempre vin reunións de todo tipo e chamábanme moito a atención, polo que en canto puiden xa me fun metendo en cousas. A verdade é que me gusta involucrarme en proxectos e ser partícipe deles. Non me gusta quedarme na crítica senón que se hai que facer unha cousa pois hai que traballar e loitar por ela.

Como está sendo a experiencia de formar parte dun equipo de goberno?
É máis ou menos como me esperaba. O PP en Cervo sempre foi un equipo, polo que me resulta sinxelo traballar con eles, ao mellor porque no meu traballo tamén teño que traballar en equipo e teño experiencia niso. Todos os concelleiros somos partícipes de todo e colaboramos todos entre nós. Reunímonos moi a miúdo e estamos en contacto diario. Estar nun goberno tamén che permite estar en contacto con temas moi diferentes e con realidades que desecoñecías e iso sempre te enriquece e resulta moi interesante.

A relación no goberno é boa, e coa oposición?
Moi ben tamén. Sempre me levei moi ben con todo tipo de xente, a ideoloxía non ten nada que ver. Por exemplo, co novo concelleiro do BNG traballei e somos amigos persoais e o portavoz do PSOE é parente meu. No pleno discútense os temas que haxa que discutir e a partir de aí as relacións persoais son outra cousa.

E co alcalde?
Con Alfonso lévome moi ben. Empezamos xuntos nisto da política e coincidimos moito por estes temas e agora estamos xuntos no Concello. Temos amizade no persoal e como líder véxoo ben, intenta facer equipo e mantén unha comunicación constante con todos os concelleiros.

Cos seus antecedentes, volverá a estar na lista de 2019?.
Si o alcalde me quere no seu equipo eu estou á súa disposición. É el o que ten que valorar o traballo  que estou levando a cabo.

"Este equipo ten proxectos ilusionantes que son moi bos para o pobo aínda pendentes"

Cambioulle o estilo de vida entrar na corporación?
Levar unha concellaría leva moito tempo, aínda que é un traballo agradecido. Se tés familia é importante consultalo con ela, porque precisas do seu apoio. Eu faleino coa miña muller, que me axuda porque sabía que me facía ilusión este proxecto.

E na relación cos veciños?
Non, porque como fun tanto tempo nas listas antes achegabanse e dicíanme a ver si podía facer calquera cousa, o único que agora me din tes que facer esto ou o outro. 

É agradecido hoxe en día estar en política?
Na actualidade igual non está moi ben vista, pero é o sistema no que estamos. Se pensas nas críticas ou no que dirán, entón xa non fas nada, pero iso tamén se dá a nivel persoal da vida en xeral.

Recomendaríalle á xente entrar na política?
Si non estás conforme con algo ou queres levar a cabo algún proxecto hai que involucrarse e a política é un xeito de facelo.

Ve ao alcalde como candidato outra vez nas vindeiras eleccións?
É un candidato moi válido e que tira moito polo concello. Empezou moi novo e agora xa ten algo de recorrido. Véxoo forte e con ganas.

Aínda ten traballo por diante?
Hai proxectos ilusionantes que son bos para o pobo, aínda pendentes.

"Formar parte dun equipo de goberno permíteche coñecer novas...
Comentarios