O Centro Comercial Histórico de Viveiro lanza esta semana a campaña Fóra Stocks, unha nova aposta por impulsar as compras no comercio local. Entre o xoves 5 de marzo e o sábado 7 un total de 36 negocios liquidarán todo o stock de temporada cuns descontos que anuncian que serán "incribles", xa que chegarán ao 70% nalgúns casos.
O propósito é converter o final de temporada de rebaixas nunha "feira de stock pero dentro de cada local", facendo da fin de semana unha festa de compras con grandes descontos en miles de artigos.
Participan na campaña locais de moda, calzado, complementos, infantil, deportes, lencería, xoias, mobles, decoración, artigos para o fogar, óptica, telefonía e florerías. A variedade de tendas que se suman fan que estas campañas sexan "todo un éxito de afluencia de clientes".
Os locais participantes na iniciativa estarán identificados con carteis de cor vermello co nome da campaña. "Tratase de ofrecer ao cliente os mellores descontos en artigos de primeiras marcas, coa mellor calidade, sen ter que desprazarse, mercando no comercio local, que ofrece un trato persoal e profesional", aseguran.