Candidato do PP en Burela
Profesión: Enxeñeiro. Primeiro ano como candidato: 2019.
Afeccións: Lectura, é un cinéfilo empedernido e gústalle a música, en especial o rock.
Manuel Rouco é enxeñeiro agrícola, ten 46 anos e vive en Burela onde desenvolve a súa actividade profesional relacionada coa dirección e execución de proxectos de infraestruturas en diferentes ámbitos. É o presidente da agrupación local do PP en Burela, o actual portavoz do grupo popular na corporación municipal e liderará a candidatura deste partido no seu municipio para "facer de Burela a punta de lanza da Mariña", pero, sobre todo, para "formar un goberno eficaz e que, á hora de tomar decisións, teña en conta aos veciños da nosa vila e as súas necesidades".
"O noso é un proxecto de presente e futuro para Burela", asegura. "Queremos traballar para construír unha vila de oportunidades para os máis novos, con atención para maiores e todas aquelas persoas que o precisen e, por suposto, contribuír á dinamización da actividade económica, social, cultural e deportiva da vila", engade o alcaldable.
"Agora mesmo Burela está perdendo poboación e servizos debido á falta de solo para o asentamento de empresas e á pésima xestión municipal como se pode apreciar en cuestións coma a nula vontade de modificar a normativa urbanística para a construción de vivendas, a suba de impostos ao comercio e á hostalería ou na mala calidade da limpeza viaria a pesar do incremento do seu custe", segundo cita como exemplos.
O candidato popular á alcaldía quere facer de Burela "unha vila da que sentirnos orgullosos e que ofreza futuro para a nosa xente". O proxecto do PP ten moi en conta o potencial de Burela, cunha ubicación estratéxica no centro da Mariña e onde se sitúa o centro hospitalario de referencia da comarca. Incide tamén na importancia do sector pesqueiro como motor da economía local, xa que o porto de Burela é un referente a nivel nacional e internacional.
O PP presentará un programa baseado en todo lle trasladaron os veciños nas distintas reunións e actividades levadas a cabo durante os últimos catro anos nos que xa defendeu moitas propostas ante a corporación municipal pensando en mellorar a calidade de vida dos veciños e veciñas de Burela e en garantir os servizos públicos. Os seus obxectivos principais son o asentamento de poboación e de empresas e a dinamización económica e social.
Asentar poboación
O concello de Burela ten posibilidades de medrar en poboación se logra asentar na vila a aquelas persoas e familias que desenvolven maioritariamente a súa actividade diaria aquí. "É imprescindible construír un concello de oportunidades que resulte atractivo para atraer familias. Debemos ofrecer servizos e actividades e, sobre todo, facilitar a construción de vivendas a aqueles que se queiran asentar na vila para evitar que elixan concellos limítrofes", di Manuel Rouco, que lembra que "a modificación do planeamento urbanístico está paralizada".
O candidato popular á alcaldía considera "fundamental" dotar a Burela de espazo para asentar empresas para evitar que se marchen para outros municipios limítrofes. Igualmente, defende políticas de apoio ao comercio local, ás pequenas e medianas empresas e aos emprendedores. "Somos un pobo aberto, no que convivimos persoas con distintas raíces, con moita xente nova, con talento e ben situado na comarca. Son tamén moitas as iniciativas innovadoras que se dan en Burela e que se deben apoiar", afirma.
Dinamización económica e social
A dinamización económica e social da vila tamén é prioritaria no proxecto do Partido Popular. De feito, Manuel Rouco aposta por "un Concello que volva liderar a actividade social da vila implicándose directamente nos eventos que se celebran ao longo do ano; ademais de ofrecer os servizos que están na súa man para apoiar aquelas actividades organizadas polos numerosos colectivos de distintos ámbitos cos que conta a vila".
Este candidato engade que "o PP aposta por acoller grandes eventos en Burela para converter a vila no centro da actividade social, cultural, deportiva e gastronómica durante varias fins de semana ao ano".
Así mesmo, Rouco sinala tamén que "Burela xa é un referente no ámbito do deporte grazas ao fútbol sala, especialmente o feminino". E engade que "temos que traballar por garantir o acceso de todos e todas ás distintas modalidades deportivas".
Os servizos sociais
A atención aos veciños é fundamental para o Partido Popular. E, polo tanto, tamén a prestación de distintos servizos sociais cos que velar pola saúde, o benestar e o desenvolvemento social dos bureleses.
O candidato popular aposta por "recursos residenciais para persoas vulnerables e en situación de emerxencia social, pola reubicación dos servizos sociais municipais para garantir a intimidade dos usuarios e por un reforzo no Servizo de Axuda no Fogar complementado con servizos de fisioterapia e podoloxía a domicilio, con máis persoal e cunha resolución inmediata das solicitudes dos usuarios".
Rouco explica que o PP defende "un pobo inclusivo e accesible para todos" e, tendo en conta que Burela é "un municipio multicultural", un goberno que "afonde nas medidas para garantir a plena integración".
