No mesmo día en que os traballadores da fábrica de aluminio de Alu Ibérica da Coruña comezaban unha folga indefinida —con acusacións cruzadas de coaccións e represión—, deputados e cargos orgánicos e institucionais compareceron onte en Foz para alertar da situación anguriante que vive a comarca da Mariña e os traballadores da fábrica de Alcoa en San Cibrao.
A intención era presentar as enmendas aos orzamentos da Xunta para o 2021, con medidas concretas para que o Goberno autonómico "participe conxuntamente co Estado na intervención pública de Alcoa, algo ao que o PP votou a favor no Congreso". Os nacionalistas póñenlle números a tal iniciativa e propoñen "que a Xunta destine 20 millóns de euros a tal fin".
Queren unha solución de futuro para San Cibrao que na Coruña os traballadores non atopan logo do apagado de cubas e venta daquela factoría de aluminio primario. Na argumentación para aportar fondos á intervención da fábrica, o deputado mariñán do BNG, Daniel Castro, quixo recordarlle ao PP, que "A Mariña representa o 33% do PIB na economía provincial e sen embargo non chega nin ao 20% dos investimentos, e isto non o podemos consentir".
Por outra banda, os nacionalistas puxeron o acento en medidas que non se ven reflectidas nos orzamentos da Xunta como é o reforzo da atención primaria na Mariña. Segundo Ana Ermida, se necesitarían dous millóns de euros máis para pediatras, enfermeiras escolares ou especialistas en obstetricia e xinecoloxía. O BNG reclama fondos para un centro de día e o polígono do Valadouro, a ampliación da escola infantil e o dragado en Foz, concentración parcelaria en Mondoñedo, nova Edar en Burela, dragaxe do encoro de Rúa, saneamento costeiro en Barreiros e outra Edar en Reinante.
