Jueves. 15.11.2018 |
El tiempo
Jueves. 15.11.2018
El tiempo

Alfonso Villares, alcalde de Cervo: "A residencia significa un servizo novo e oportunidades laborais"

Alfonso Villares, no parque de Cervo. IRIA L. V.
Alfonso Villares, no parque de Cervo. IRIA L. V.

O último mandato en Cervo estivo marcado pola posta en marcha de proxectos coma a residencia, que levaba tempo feita ou o centro de emprendemento de Sargadelos, que se convertiu no emblema da aposta patrimonial do equipo de goberno

Máis de vinte anos despois de entrar na política, Alfonso Villares, alcalde de Cervo (PP), conserva a ilusión do primeiro día. Doce anos como concelleiro, primeiro no grupo da oposición e despois do goberno, e con tres mandatos ás súas costas en canto remate este, é un firme defensor do municipalismo e vicepresidente primeiro da Federación Galega de Municipios e Provincias (Fegamp) e presidente da comisión de medio ambiente da Federación Española de Municipios y Provincias (FEMP).

Que balance fai deste mandato?
Positivo, porque se levaron a cabo moitas das cousas que nos plantexamos. Algunhas das máis salientables foron a posta en marcha da residencia e centro de día, que é un servizo novo que lles vai reportar moitos beneficios aos veciños, as inversións en redes de abastecemento e de saneamento nas aldeas e tamén se tomaron medidas significativas como a baixada de impostos a grande empresas, que foi un dos motivos polo que a piscifactoría ubicada no polígono de Cuíña se decidiu en parte a investir 16 millóns de euros na planta e levar a cabo a cría de lenguado, o que supón a creación de 25 postos de traballo. É dicir, fixéronse inversións pero tamén se tomaron decisións que repercuten dun xeito positivo na vida dos veciños.

Se tivera que destacar algo do traballo deste anos, que sería?
O centro de día e residencia, porque ofertamos un servizo para atender aos nosos maiores preto da casa, xa que os cervenses teñen preferencia á hora de acceder a unha praza, e tamén polo que significou de creación de emprego e de movemento para a economía local.

Cervo conta cun concelleiro de patrimonio, por que esta aposta?
Dende o goberno decidimos apostar polo aspecto patrimonial desde a súa perspectiva turística, porque o patrimonio que temos é unha riqueza neste sentido. Somos donos dun patrimonio importante vinculado a Sargadelos, que nos da un nome que chega fóra das nosas fronteiras e partindo deste punto quixemos darlle forza ao aspecto patrimonial.

En Sargadelos crearon un centro de emprendemento que acaba de botar a andar.
Sargadelos precisa que haxa actividade continuamente porque iso dalle un valor engadido e os emprendedores que alí se instalen tamén van favorecer que máis xente se achegue e por iso apostamos por este centro de emprendemento. Pero ao fío disto, quedan máis cousas por facer porque hai moitos edificios públicos aos que é difícil darlles vida e a mellor forma é abrilos á iniciativa privada.

Seguindo co patrimonio, tamén actuarán na zona da Atalaia.
A zona da Atalaia contará cun plan de protección especial no que se van poñer en marcha unha serie de medidas nas zonas públicas e tamén noutras.

Tamén hai patrimonio cultural.
Si, por exemplo os circuítos culturais da praia do Torno que recordan a actividade das canteiras de San Cibrao. É importante poñer en valor o patrimonio cultural para que podan aproveitalo as xeracións futuras.

Unha das súas liñas de traballo tamén é a conciliación.
É algo no que tamén invertimos, porque pensamos que é fundamental. Por iso temos programas de conciliación en distintas épocas do ano e aumentamos a capacidade da escola infantil.

Que proxectos ten en mente para o que queda de mandato?
Vamos apostar polo I+D+i. Xunto ao Instituto Tecnolóxico de Galicia imos crear un espazo de investigación de drons en zonas marítimas no polígono de Cuíña. Tamén teño ilusión por recuperar, embelecer e protexer a zona da Atalaia e estamos traballando en humanizar varios espazos públicos para mellorar a súa imaxe e facelos máis accesibles. En realidade temos moitas ideas que iremos analizando nestes meses para intentar levalas a cabo.

Outra das cousas que puxo en marcha foi a contratación de xoves con bolsas Feuga.
Si, apostamos por este tipo de formación porque lles permite aos máis novos achegarse ao mundo laboral unha vez que acaban os seus estudios. É unha experiencia que está sendo moi positiva.

Moi persoal: A miña ilusión e seguir exercendo como alcalde

Leva dende 1995 na política, pero parece que conserva a ilusión.
Si, teño moita ilusión por seguir facendo cousas e sigo con ideas que quero sacar adiante.

Iso significa que repetirá como candidato en 2019.
Gustaríame repetir. Cando sexa o momento de tomar esa decisión, falarase e decidirase pero pola miña parte teño ilusión de seguir desempeñando o meu traballo no eido público.

Ten cargos na Fegamp e na FEMP, gustaríalle un cargo na administración provincial ou autonómica?
Tanto a Fegamp como a FEMP están vinculadas ao municipalismo. Son representante dos concellos do PP nestes órganos e estou orgulloso de desenvolver ese traballo. As dúas cousas son compatibles coa actividade da alcaldía. O meu traballo é o de alcalde e seguir exercendo como tal é a miña ilusión.

Dentro da FEMP preside a comisión de medio ambiente e iso tamén se nota nas decisións que toma no Concello.
En materia de medio ambiente fomos un Concello que estivo á vangarda. Estamos traballando neste ámbito dende fai moitos anos e non nos empezamos a preocupar por iso a raíz da ola de incendios que sufriu Galicia o ano pasado. Levamos reforestadas unhas 20 hectáreas de terreos municipais con árbores autóctonas e esta é unha aposta de futuro, non só polo que implica de beleza natural para o municipio senón polo que implica para as xeracións futuras e tamén para o desfrute e o benestar da veciñanza.

Curiosidades
Conta con 4.274 habitantes, con 49 de media
O concello de Cervo conta cunha superficie total de 77,9 kilómetros cadrados e está conformado por seis parroquias: Castelo, Cervo, Lieiro, Rúa, San Román de Vilaestrofe e Sargadelos. Segundo os datos do Instituto Galego de Estatística (Ige) correspondentes ao ano pasado, conta con 4.274 habitantes, dos cales 2.097 son homes e 2.177, mulleres. A media de idade achégase aos 50 anos ao fixarse en 49,9.
Economía
A multinacional Alcoa, ubicada entre este municipio e o de Xove, marca en grande medida a economía cervense. Ao redor da alúmina tamén se foron creando distintas industrias auxiliares, o que fai que este sector teña un peso significativo na economía local. Pero tamén se desenvolve actividade na construcción, no sector primario e nos servizos, onde se concentran a meirande parte das empresas. Unha das características da maior parte das firmas asentadas na localidade e que son de pequeno tamaño.

Alfonso Villares, alcalde de Cervo: "A residencia significa un...
Comentarios