Alá polo ano 2010, o popular programa da Televisión de Galicia Luar poñía a andar un formato co que cada recuncho da comunidade se vía reflictido a través da música e das cualidades vocais dos seus representantes. Logo de case dez anos en antena, o espazo presentado por Xosé Ramón Gayoso apostou por rescatar algunhas das mellores voces que pasaron polo concurso e dar forma así aos Recantos de Ouro, nos que a Terra Chá está representada polos irmáns Fanego, que desta vez participan como dúo. Este venres, día 15, é a final desta primeira fase, na que un representante deberá abandonar o programa.
"Para algunhas cousas é máis fácil porque estamos acostumados a traballar xuntos", di David, o 50% dos irmáns Fanego, ao tempo que engade que "a técnica é máis complexa, porque te obriga a facer harmonías e a sincronizarte". E é que ambos saben ben o que é traballar un a carón do outro durante case todo o ano, grazas ao dúo Estrellas, que os leva por ducias de festas dende o 1 de xaneiro ata o 31 de decembro. Este 2019 pecharano cunhas 140 actuacións.
Os irmáns Fanego comezaron como dúo Estrellas en 2012, uns meses antes de que David pasara a formar parte de Recantos
O proxecto co que estes dous vilalbeses se adentraban no mundo da verbena comezaba un 24 de novembro de 2012, só uns meses antes de que David pasara a formar parte de Recantos. Un ano despois, collía o seu testemuño a súa irmá Ana. E pese a ter experiencia ante o público, o concurso televisivo "nada ten que ver" coas actuacións do dúo. "Nas festas empregamos un repertorio actual", di Ana, "pero en Luar son as cancións dos avós cantadas polos netos", completa o seu irmán.
Ambos quedan cos consellos de Andrade, que "ademais de gardar unha moi boa persoa detrás do personaxe, valora con criterio e de xeito técnico", ademais das achegas de Piñeiro, máis enfocadas ao plano escenográfico.
O éxito que colleitaron ambos tras o seu paso polo programa e representar a súa comarca, "toda unha responsabilidade", apunta Ana, compróbano en cada festa á que acoden e en cada persoa que os recoñece como "os do Luar". E iso que, tal e como sinala David, "aínda quedan moitos por saír do armario luareiro", bromea.
Rosana participou nunha primeira edición na que vencera Maret, mentres que a chairega conseguira un meritorio posto entre os cinco mellores. O seu primeiro tema foi elixido por ela, Que te quería, e os seguintes, seguindo a mecánica do concurso, escollidos polo propio programa.
Este mozo de Guitiriz comezou en Recantos "por sorpresa" e na súa edición quedou ás portas da semifinal, marcando un dos récords de votos do público (5.361 votos). Pese a que o seu é a produción audiovisual, afirma que a música, na que comezou con só tres anos, é para el "un hobby".
O guitiricense Marcos Roca débelle o seu paso pola tele ao seu irmán, quen o presentou ao concurso porque "sabía que me apetecía" e chegou ata semifinais, gala na que cantou Vivir así es morir de amor. Ata ese momento, logrou ser un dos concursantes máis apoiados polo público.
Este vilalbés xa pasara polas cámaras da TVG e de Telelugo. Desa edición, que abandonou ás portas de cuartos, recorda como o momento "máis bestia" a gala na que tivo que cantar dúas veces por problemas cos monitores.
Primeiro como público e un ano máis tarde, dende dentro. Despois de cantar Corazón contento, Cartagenera, Pídechas o corpo —na que "mellor o pasei"— e Fue tan poco tu cariño, tocoulle deixar o concurso. Foi repescada para a 5ª fase.
.
Este trotamundos da música compaxinou o seu paso polo concurso luareiro con varias idas e voltas ao hospital. Pese ás circunstancias, define a súa estadía no Recantos como algo "incrible, a nivel persoal e artístico" e aos membros de Luar como "unha familia". A súa participación rematou como semifinalista, gala na que caeu fronte á representante de Ourense, aínda que nas catro primeiras fases este vilalbés de adopción capitaneaba a clasificación. Unha das lembranzas que conserva é a actuación do tema O Rei, unha canción coa que chegou aos 29 puntos pese a que "non me gustaba nada, pero ese día foi tan guapo que a incorporei ao meu repertorio", afirma.
Esta moza finalizaba o seu paso polo concurso na primeira fase, tras cantar Sobrevivirei e levando "moitos compañeiros, como Verónica Cambón", a representante das Terras de Lugo. "Son moi nerviosa e a verdade é que non me foi ben", recoñece ao tempo que engade que "tamén me axudou a superar medos, a facerme forte e a saber levantarme". A súa traxectoria inclúe a Tropicana, a Principal e a Nevada, aínda que agora continuará "na música, pero non na verbena", avanza.
Este lugués con raíces en Cospeito chegou a cuartos de final de Recantos e do seu paso garda un recordo especial da actuación de Bailar pegados, "por meu pai, que faleceu hai uns anos e sempre o recordo cantando esa canción", lembra Borja.
A representación desta taboadesa pola Terra Chá débese á formación da que era integrante, a Breixa Band de Castro. En Recantos caeu na gala previa ás semifinais, por só un punto, e do xurado destaca "os consellos de Andrade e de Tania Fuegho".
