domingo. 07.03.2021 |
El tiempo
domingo. 07.03.2021
El tiempo

Unha viaxe entre zapatos

Ferramenta e útiles de zapateiro, no Museo Etnográfico Monte Caxado das Pontes. EP
Ferramenta e útiles de zapateiro, no Museo Etnográfico Monte Caxado das Pontes. EP
José María López escribe no terceiro Caderno do Museo Etnográfico Monte Caxado acerca do oficio dos artesáns do calzado das Pontes

O terceiro Caderno do Museo Etnográfico Monte Caxado das Pontes xa está no prelo e se na primeria edición o seu autor, José María López Ferro, regresou ao pasado para relatar nas súas páxinas a tradición da caza no municipio pontés e na segunda inventariou os distintos peches das fincas, moitos a piques de desaparecer, esta vez elixiu facer unha viaxe entre zapatos cunha obra que pretende ser tributo e historia escrita dun oficio que esmorece. 

"Tiña ganas de facer algo de oficios, temos moitas pezas e ferramenta no museo e ao final apostei polos zapateiros, é algo que vén de moi antigo na vila e é algo que se perde", di o presidente da fundación Museo Etnográfico Monte Caxado, que asegura que xa no catastro do Marqués da Ensenada, en 1752, se falaba de oficios nas Pontes e xa aparecían os zapateiros, xunto aos arrieiros ou fundidores, entre outros moitos. 

zapatos 2"O traballo é un recoñecemento e unha homenaxe humilde a estes homes, sen esquencer ás súas donas, porque moitos abriron tendas e a maioría das mulleres estaban á fronte das zapaterías, na parte de venda", di López Ferro. 

O traballo incluirá varios apartados, entre os que haberá uns aspectos xerais de historia tras o limiar, a visión do etnógrafo Xaquín Lorenzo Fernández, Xocas, sobre o oficio e un apartado para falar das pezas que hai no museo —un para o calzado feito a man, os bolsos... e outro para a distinta ferramenta, a mesa e o tallo de traballo—.   

Este terceiro caderno, que como o primeiro e o segundo será financiado pola Deputación da Coruña, ademais, inclúe un apartado adicado ao proceso de feitura dun zapato da man de Pepe Castro, e un capítulo centrado nos zapateiros das Pontes. 

"Non teño relación de todos", indica López Ferro, que asegura que a situación epidemiolóxica tampouco axuda para levar a cabo unha investigación, xa que hai máis dificultades para contactar con algunha xente, sobre todo coa máis maior. 

Aínda así, o traballo cita a unha trintena de zapateiros que estiveron en activo durante o século XX ou principios do XXI. "Unha vintena aparecen reflexados con datos e fotografías, outros once simplemente citados", di o autor da obra que, como nos anteriores cadernos, reserva unhas páxinas para a cultura popular, con refráns e adiviñas acerca dos zapateiros, e outras para unha galería fotográfica dalgúns dos que crearon calzado coas súas mans.

Unha viaxe entre zapatos
Comentarios