Un San Simón con moito gusto

Un dos concursos de tapas máis lonxevos e tamén máis específicos, ao ser o queixo de San Simón un ingrediente esencial en todas as propostas, alcanza estes días a súa duodécima edición, coa participación dun total de 38 locais de Vilalba.

O XII Concurso de Tapas do Queixo San Simón da Costa arrincaba o pasado xoves 21 e estenderase ata o domingo 31, unha vez máis con dúas modalidades de competición: creativa, á que concorren catro locais, e tradicional, na que participan os 34 establecementos restantes.

Os pratos poderán probarse todos os días pola tarde, no horario habitual de tapas —os negocios que así o queiran tamén poderán servilas en horario de mañá— e a fin de semana deberán ofertarse tanto a mediodía coma pola tarde. As tapas tradicionais serviranse ao prezo único de 1,5 euros, mentres que o custo das creativas vai dos 2,5 aos 3,5 euros. 

O público poderá valorar todas as propostas e terá nas súas mans unha doble responsabilidade, por unha banda, escoller a mellor tapa en cada unha das modalidades, e por outra, definir cales serán as catro finalistas que catará o xurado profesional —as creativas, ao ser só catro, están directamente clasificadas— o sábado 6 de abril pola mañá, a partir das 11.30 horas, na final que se celebrará na Praza da Constitución na primeira xornada da XXV Festa do Queixo San Simón da Costa.
Os oito finalistas prepararán as súas respectivas tapas en directo, ante o público que queira asistir e o xurado, que estará formado por tres cociñeiros profesionais, un representante da Asociación de Queixeiros de San Simón da Costa e a concelleira vilalbesa Cheri Grandío.

Ademais, todos aqueles clientes que saboreen un mínimo de dez tapas, entrarán no sorteo de diferentes premios, coma lotes de queixos, ceas para dúas persoas ou estancias en hoteis. O folleto da ruta tamén presenta este ano unha novidade, pois no canto do mapa coa localización dos 38 locais participantes, recolle unha fotografía da tapa ofertada pola maioría deles. 

Como é costume, o concurso de tapas promóvese como introdución da Festa do Queixo de San Simón, que este ano cumpre 25 anos. Ademais do día 6, no que o actor Luis Zahera lerá o pregón, tamén se celebrará o 7, día no que están previstos showcookings de Jacobo Santeiro e Marcos Morán.