jueves. 04.06.2020 |
El tiempo
jueves. 04.06.2020
El tiempo

O rexurdir do patrimonio olvidado

Escola de Santalla. A. GONZÁLEZ
Escola de Santalla. A. GONZÁLEZ
Ribeira de Piquín proxecta rehabilitar dúas novas escolas para sumalas ás tres que xa se remodelaron en Navallos, Santalla e Os Baos

Acolleron a decenas de nenos hai anos. Foron claves para o día a día dos veciños. Pero os edificios foron quedando en desuso cando chegou a agrupación escolar e os alumnos se foron. O paso do tempo foi deixándoos caer no olvido e quedaron baleiros. Pero os esqueletes de pedra e formigón mantivéronse en pé e agora están recobrando vida

En Ribeira de Piquín xa non quedan escolas, pero os edificios que as acolleron están rexurdindo. O colexio Aníbal Otero, situado no Chao do Pousadoiro, pechou as súas portas ao rematar o curso 2012-2013, e volveron abrir neste 2019 para acoller o ansiado centro de día que soña con compartir espazo cunha futura residencia de maiores no piso superior. 

As escolas unitarias pecharon moito antes, pero tamén están volvendo a abrir as súas portas. Os veciños rehabilitaron hai tempo a dos Baos, que está pendente de inaugurar, e o Concello acaba de finalizar a reforma da de Navallos e a de Santalla.

"O noso obxectivo é rehabilitar unha escola en cada parroquia do concello", di o rexedor de Ribeira de Piquín, Roberto Fernández Rico, que indica que a de San Xurxo será a seguinte, tras o que se fará o mesmo noutra en Santiago de Acevo, onde non está decidido aínda cal será a que rexurdirá. 

"Por unha parte poñemos en valor patrimonio do concello que estaba olvidado e por outra conseguimos locais sociais para os veciños, para que teñan un lugar onde reunirse", explica o rexedor de Ribeira de Piquín, que indica que nas escolas de Navallos e Santalla, que son de dúas plantas, o piso de abaixo, que é un espazo diáfano, dedicarase a local social, mentres o de arriba, a antiga casa do mestre, servirá como vivenda de emerxencia social. 

"Aproveitamos a distribución que xa teñen as casas e así podemos ofrecer viviendas para emerxencia social, para xente sen recursos, cun problema concreto... Non había ningún local habilitado no concello para ningún tipo de emerxencia e cremos que é importante poder dispoñer del", valora Fernández Rico. 

FUTURO. "O proxecto para a escola de San Xurxo de Piquín xa o temos feito e a nosa idea é facer a obra ao longo de 2020", anuncia o alcalde, que explica que a idea do goberno municipal é intentar tramitar axudas para conseguir financiamento. 

Escola de Navallos. A. GONZÁLEZNa escola de Navallos invertíronse 60.000 euros, cunha axuda do 70% do GDR 3. Na de Santalla, as obras fixéronse en dúas actuacións. A Deputación de Lugo sufragou as obras para restaurar o tellado e logo destináronse 40.000 euros ao resto da rehabilitación. En ambas, fixéronse obras no exterior e no interior dos inmobles. 

MUSEO. O caso da escola dos Baos é diferente. A asociación de veciños solicitou unha subvención de 12.000 euros á Xunta para restaurar o inmoble, pero aquí, a maiores de conseguir un local social, tamén se buscaba conservar o espírito da escola, nunha especie de museo parado no tempo. 

"É onde aprendemos a ler e a escribir, nós es nosos pais antes, e é algo importante. Intentamos conservar o que fixeron os veciños con tanto esforzo hai tantos anos", explica Manuel Pardo, o presidente do colectivo veciñal da parorquia dos Baos, que indica que a escola construíuse probablemente e polo que recordan algúns veciños na década de 1920. 

"A escola, agora rehabilitada, serve para local de reunións e de punto de encontro, e para o que necesiten os veciños e lles faiga falta", di Manuel Pardo, que invita a unha viaxe no tempo ao atravesar a porta. "Dentro segue sendo escola. Aínda están os pupitres e hai libros gardados, tamén está a mesa da mestra e mapas antigos", explica o presidente do colectivo, que indica que o piso conservouse na madeira orixinal. "Cambiamos o tellado, os canalóns e pintouse", destaca. 

O rexurdir do patrimonio olvidado
Comentarios