Quijada deseña unha simbólica escultura para os xardíns de Parga

O Concello encargou a peza tras dedicir retirar unha fonte polo seu "mal estado"
Quijada e Morandeira, xunto á escultura de Parga. EP
photo_camera Quijada e Morandeira, xunto á escultura de Parga. EP

O acondicionamento do seu contorno e a instalación dunha iluminación ornamental completaron o proceso de renovación dunha parte dos xardíns da estación do tren de Parga, onde xa lucía dende hai un tempo unha nova e simbólica peza escultórica obra de Xabier Quijada.

Tallada nunha única peza de granito de Parga que ronda os dous metros de altura, a creación artística inclúe todos aqueles elementos que para o seu autor son representativos da vila. "Quería que representase o pobo de Parga, así que incluín a ponte do río, a vía do tren, o cano da fonte de Valdobín, a torre do castelo, unha folla de carballo que simboliza a carballeira e a parte de arriba é unha muller cunha cesta que vai á feira", detalla Quijada sobre unha escultura que tivo unha gran acollida entre a veciñanza.

"Todos me dixeron que lles gustara, que estaba moi guapa", apunta o canteiro, natural de Begonte e afincado en Guitiriz, que nada máis recibir o encargo por parte do Concello tiña claro que a obra que deseñase debía "incluír os elementos máis senlleiros de Parga", unha idea compartida polo goberno local.

Escultura de Xabier Quijada. EP
Imaxe do conxunto escultórico. EP

"Queriamos algo representantivo de Parga e iso foi xusto o que fixo Quijada", di a alcaldesa, Marisol Morandeira, que lembra que, logo de comprobar o "mal estado" no que se atopaba a fonte que había nos xardíns "resolveuse quitala". Estudaron entón que colocar no seu lugar e finalmente decidíronse por unha escultura, "seguindo a liña de colaboración e de posta en valor do traballo dos artistas locais", precisa a alcaldesa guitiricense.

Casa do Concello

Froito deste mesmo desexo de darlle visibilidade as creacións dos artesáns locais xurdía tamén a iniciativa de adquirir varias das súas obras para decorar a casa do concello logo da súa renovación.

Quijada achegou dúas pingas de auga feitas de toelo –tipo de pedra propia de Moeche– e outras dúas esculturas de granito feitas na pandemia que, segundo explica o propio autor, simbolizan o que se botaban en falta as apertas e o contacto humano.

Tamén se incluíron na nova decoración cadros de Jorge Alba González e de Pili Iglesias e agora, segundo avanza Morandeira, nesta mesma liña de traballo, estase a preparar un novo proxecto co canteiro Ramón Villar.

Comentarios