Unha das finalidades deste 2020 do Concello de Cospeito pasaba pola loita polo medio ambiente, obxectivo que materializaron coa adhesión ao pacto de alcaldes, que comezaron a executar este ano co Plan de Acción para a Enerxía Sostible e o Clima (Paces) e que implica a aplicación de compromisos para "mellorar a eficiencia enerxética, conseguir a redución de emisións de CO₂ no ámbito local e aumentar a resiliencia ao cambio climático", detalla o rexedor, Armando Castosa.
O documento inclúe o inventario daqueles elementos do concello susceptibles de aplicárselles estas medidas enerxéticas, como o alumeado público (cambiáronse 420 luminarias en Muimenta e está adxudicada a renovación das mesmas en dous barrios de Xustás), en instalacións municipais (cambiouse a luces led os colexios de Feira do Monte e Muimenta) e no parque de maquinaria .
Por outra banda, desde o Concello "fixemos un proxecto de recollida separada de fracción orgánica que presentamos á Xunta para optar a unha axuda, que foi concedida", di Castosa, pola que adquiriron colectores de residuo orgánico e azuis, bolsas compostables e cubos de prolipropeno. Ademais, a recollida de materiais pesados agora faise a domicilio e deposítase directamente no punto limpo para o seu tratamento.
No marco da loita pola concienciación medioambiental a través da recuperación paisaxística, o Concello creou sendas verdes na contorna da lagoa e "estamos traballando para dotar de uns 50.000 metros cadrados de zona verde na capitalidade municipal que se poderá ver nun futuro próximo", adianta o alcalde.
Tratamento da auga
A rede de abastecemento conta, en varios puntos, con telexestión e control do tratamento da auga potable.
