"Nós sempre lle chamamos A Ramalleira", afirmaba Domingo. Arrincou entón unha longa e intensa investigación de Fernando Villapol, que se viu somerxido nun remuíño de papeleo ata que deu cuns documentos de compravenda datados en 1674 nos que, efectivamente, aparecía mencionado o nome A Ramalleira Da Riva. Xa tiñan o que querían amosar. Porén, o destino tiña reservada unha sorpresa que deu un importante valor engadido ao traballo.
O Camiño Francés percorría o lugar! No mesmo documento, Villapol comprobou sorprendido unha clara evidencia de que parte deste camiño primitivo estaba situado na propia Ramalleira. "Despois converteuse en Camiño Real, máis adiante xa foi coñecido como o camiño que ía á cidade de Mondoñedo e na actualidade puxéronlle uns números", apuntou o artista e veciño de Bretoña.
O descubrimento foi extraordinario. Unha verdadeira xogada mestra, onde artista e veciño se uniron para facer unha reivindicación histórica. Foi o pasado sábado 20 cando o proxecto alcanzou un paso crucial coa emocionante inauguración dunha escultura de pedra onde se gravaron as palabras A Ramalleira e Camiño Francés.
O acto congregou case medio cento de asistentes -unha cifra moi significativa dada a escasa poboación do lugar-, que acompañaron con entusiasmo a uns Doval e Villapol resplandecentes e cheos de orgullo xunto á súa obra.
"Agardo que isto sirva como un primeiro paso para seguir traballando neste sentido e estudando os distintos camiños", pediu Fernando Villapol, autor da obra Ciencia e conciencia, historia social.
O alcalde da Pastoriza, Primitivo Iglesias, que tamén estivo no acto, contestoulle de forma clara. "Sabedes que podedes contar comigo, non como alcalde, senón como persoa interesada no mundo da toponimia e da lexicografía", indicou.
Agardo que isto sirva como un primeiro paso para seguir traballando neste sentido e estudando os distintos camiños"
Ademais, o rexedor quixo felicitar a ambos pola "fantástica" iniciativa para concluír cunhas verbas que non deixaron indiferente a ninguén e que deron mostra da intención real da pedra. "É unha forma de dar coñecemento e, sobre todo, recoñemento do noso. Ás veces non o facemos, pero debemos defender o noso patrimonio", afirmou ante os aplausos dos presentes.
Agora, esta nova pedra, bautizada para limpar calquera impureza, deixa constancia dunha demanda que a familia de Domingo Doval viña facendo durante anos, o emprego do nome da Ramalleira. Esta é a primeira pedra nun camiño que intentará protexer e dar valor ao patrimonio da Pastoriza e as súas parroquias.