Viernes. 21.09.2018 |
El tiempo
Viernes. 21.09.2018
El tiempo

Máis de 400 persoas renderon homenaxe en Vilalba ao sacerdote José Gallego Vila

José Gallego (segundo pola dereita) saudando a asistentes ao acto. MARÍA ROCA
José Gallego (segundo pola dereita) saudando a asistentes ao acto. MARÍA ROCA

Os veciños das dez parroquias que atende fixeron este acto con motivo dos seus 50 anos en dúas delas

"O chegar é bonito, pero aguantarse tanto tempo ten o seu mérito. E máis bonito aínda é que te queiran despois de 50 anos", manifestou o párroco José Gallego Vila, natural de Riotorto, na homenaxe que se lle rendeu onte en Vilalba con motivo do seu medio século á fronte das parroquias vilalbesas de Árbol e Carballido.

Máis de 400 persoas quixeron acompañalo nun día tan especial e no que o acto central foi unha comida popular no restaurante Montero da capital chairega.

Alí déronse cita veciños e veciñas de todas as idades non só das mencionadas parroquias, senón tamén das outras oito que atende: as vilalbesas de Oleiros, Nete e San Xurxo de Rioaveso; Baltar e Pousada, na Pastoriza; Moncelos, en Abadín, e Goá e Santalla de Rioaveso, en Cospeito.

José Gallego manifestou sentirse "encantado" coa homenaxe, aínda que "cos pés na terra". Tamén recoñeceu a súa sorpresa pola cantidade de xente que acudiu á cita. "Sospeitaba que podía vir xente, botando a conta de que podían estar uns 30 veciños por parroquia, pero non esperaba tanta como foi ao final", afirmou.

Antes de iniciar o xantar, o homenaxeado fixo unha entrada triunfal, con ovación incluida, no salón de banquetes, acompañado polo grupo de música tradicional da asociación cultural e de veciños de Árbol. A continuación, xa na mesa presidencial, Gallego dirixiuse aos asistentes para agradecerlles a súa presenza e amosarlles o seu agarimo tras tantos anos traballando nas súas parroquias.

Na sobremesa, o homenaxeado recibiu de agasallo un reloxo gravado, unha réplica de Sargadelos da Torre dos Andrade e, como broma -é afeccionado ao Barça-, unha camiseta do Real Madrid.

No acto de homenaxe tamén estiveron presentes os alcaldes de Vilalba, Agustín Baamonde; de Abadín, José María López Rancaño, e da Pastoriza, Primitivo Iglesias.

Máis de 400 persoas renderon homenaxe en Vilalba ao sacerdote José...
Comentarios