A Feira da Maquinaria Usada de Cospeito terá, por segundo ano consecutivo, un espazo para cantar e bailar ao son dos ritmos tradicionais coa celebración da II Festa da Música, na que actuarán os cospeiteses Asubíos da Chaira e o grupo invitado, os vascos Os Jarteiriños-Nosa Terra.
Despois de presentar a novidade na edición pasada, na que o grupo convidado foi a banda de gaitas Dambara, de Burela, a cita cospeitesa certifica a continuidade da aposta pola música, que será mañá, domingo, ás 13.30 horas na Praza Campo da Feira, na capitalidade municipal. Ademais, hoxe Asubíos da Chaira e mañá Os Jarteiriños-Nosa Terra farán cadanseu pasarrúas.
A promotora da música na asociación Asubíos da Chaira, Andrea Méndez, explica que a Festa da Música xurdiu porque querían "facer intercambios culturais con outras bandas de música", e ademais tiñan ganas de que fosen de "fóra de Galicia".
Seguindo esa idea, Asubíos da Chaira foi ao País Vasco a tocar cos Jarteiriños-Nosa Terra o 8 e o 9 de xullo do ano pasado, nunha experiencia "marabillosa", di Andrea, e agora é a banda vasca a que chega á Feira do Monte para amosar a súa música e facer que o público goce con eles.
Ademais dos concertos e dos pasarrúas, ámbolos dous grupos farán unha xornada de convivencia durante a fin de semana. "É algo moi bonito que non poderiamos facer sen a axuda do Concello de Cospeito –organizador do evento– e da asociación de mulleres rurais Cousas Nosas, en temas como o aloxamento e as comidas, entre outros", indica Andrea Méndez, moi agradecida por esta colaboración que nacía o ano pasado e espera que teña continuidade.
"A primeira edición, que foi un pouco de proba, fixémola coa banda de gaitas Dambara, de Burela. Nós fomos alí ás festas patronais, tocamos con eles e fixemos piña, e eles fixeron o mesmo despois na Feira da Maquinaria Usada", apunta, moi contenta co resultado obtido daquela xa que, ademais de "atraer moita xente a pesar de non facerse previamente e ser algo completamente novo", serviulles para "gañar moita amizade coa banda de gaitas e formar irmandade", algo que ven con moi bos ollos en Asubíos da Chaira.
Inicios Asubíos da Chaira fórmase no ano 2019 e comeza cun curso de pandeireta, que foi «todo un éxito», explica Andrea. "Despois, moita xente estaba interesada en tocar outros instrumentos, e foi cando se artellou a creación do grupo", apunta. Citas O grupo conta con tres festivais fixos que fan anualmente: o de Nadal, a Festa da Música e o de fin de curso, onde só actúan os nenos.