Unha ini
ciativa comunitaria enche de mecos as rúas do concello de Muras polo Entroido cunha proposta novedosa que trata de afondar nas tradicións. Os novos visitantes repártense por todo o casco urbano, sentados en prazas ou amarrados en sinais de tráfico, para despertar sorrisos entre os transeúntes de sempre e os visitantes que chegan para deixar claro que estes días é o tempo dos disfraces e das máscaras.
A iniciativa foi proposta polo Concello á profesora de manualidades, Cristina Fernández, para facer coas mulleres que asisten as súas clases. E a resposta foi unánime.
"Xurdiu da idea de decorar as rúas igual que se decoran en Nadal pero con temática de Entroido. Sempre tiven esa teima, que o que fai o Concello teña algún efecto no pobo e a idea de facer os bonecos foi moi ben aceptada", explica Belén Chao, a tenente de alcalde do Concello de Muras, quen se mostraba "contenta" e orgullosa dunha iniciativa que xerou dende o principio "unión, motivación e moito traballo desinteresado" e que está tendo unha "repercusión no pobo".
O grupo de 15 mulleres das clases de manualidades preparou os bonecos durante as últimas semanas e dado o éxito do seu traballo esta fin de semana colocaranse máis noutros puntos do municipio.
