A reportaxe da Chaira

A idade non é unha barreira para aprender

A volta da universidade para maiores, tralas vacacións en Guitiriz e en Xermade, e cunha nova edición nas Pontes, abren portas á sabedoría
Concerto de membros da Uned Sénior Terra Cha-Eume durante o festival de Entroido. D.CENDÁN
photo_camera Concerto de membros da Uned Sénior Terra Chá-Eume durante o festival de Entroido. D.CENDÁN

Asociar universidade con xuventude, con estudar moito e moi duro e con sacar un título para logo lanzarse ao mundo laboral é algo moi habitual, xa só con ver a palabra, ou ata sen chegar a facelo. Pero non todo o mundo está de acordo con iso, e en Xermade, en Guitiriz e nas Pontes demóstrase que non ten porque ser así, e que non hai que ter 20 anos para gozar da aprendizase universitaria.

E é que nunca é demasiado tarde para ir a clase, descubrir, viaxar e facer amizades, tanto dentro dunha aula, na que se dan tanto leccións teóricas como prácticas, como no lugar máis recóndito de Galicia, ou mesmo saíndo fóra da comunidade. E si, todo isto tamén se pode facer na universidade.

Na Uned Sénior Terra Chá-Eume, con sedes en Guitiriz e Xermade —entre outros moitos concellos—, e na Universidade Sénior das Pontes, son moitas as persoas que, pasados xa, no primeiro caso, os 55 anos, e no segundo, os 50, se animan a probar novas experiencias e a volver ás aulas, con tres motivacións principais: formarse, gozar e coñecer xente.

Ademais, ámbalas dúas volven á actividade nos primeiros meses do ano, datas moi esperadas polos alumnos, que están "moi contentos cos cursos", que lles achegan "coñecementos e felicidade".

Membros da Uned Sénior Terra Chá-Eume, nunha viaxe en Boqueixón. EP
Membros da Uned Sénior Terra Chá-Eume, nunha viaxe en Boqueixón. EP

No caso da Uned Sénior Terra Chá-Eume— que chega aos 15 anos de existencia e depende da Uned da Coruña— comezou a principios deste mes o segundo cuadrimestre do seu curso académico, que acaba en xuño. Entre as aulas de Guitiriz e de Momán suman 105 matrículas e os estudantes, tras unha semana de vacacións, retomaron a actividade dun xeito moi ameno, cunha visita á Fundación Neira Vilas na materia de Historia de Galicia e cun festival de Entroido no que se xuntaron todos en Guitiriz.

Así, os alumnos veteranos reencóntranse e os novos únense ao grupo e convértense nun máis. Este é o caso de Luci Roca, natural de Parga, que aos seus 69 anos é unha das persoas que comezou este curso na Uned Sénior.

"É unha experiencia moi boa e aprendes moito, eu estou empezando a manexar un ordenador, cousa que me era impensable hai anos"

"Acordóuseme apuntarme porque é unha forma de saír da casa e de coñecer xente, ademais de que a min me gusta moito a pandeireta", explica ilusionada, á vez que di que vai "a música, a pesar de que nunca antes tocara e aprender ás veces faise algo complexo".

Aínda que lle gusta todo o que fai na Uned Sénior en Guitiriz, Luci destaca, en pleno festival de Entroido, que o mellor é "a troula e as saídas a tocar, a bailar, e a pasalo ben cos compañeiros".

"Xa ían meus pais e facíalles moi ben, e co tempo acabeime anotando eu", conta Marina Gómez, de 65 anos e natural de Momán, que incide en que a súa decisión foi "todo un acerto".

"É unha experiencia moi boa e aprendes moito, eu estou empezando a manexar un ordenador, cousa que me era impensable hai anos, e tamén viaxei por Galicia e España, descubrindo novos sitios", explica, orgullosa de todo o aprendido e vivido.

Promoción da cuarta edición da Universidade Sénior das Pontes. EP
Promoción da cuarta edición da Universidade Sénior das Pontes. EP

Na Universidade Sénior das Pontes, dependente da Universidade da Coruña (UDC), a nova edición comeza en marzo. Así, os inscritos farán do auditorio da Casa Dopeso a súa aula, onde recibirán as sesións teóricas, que darán paso ás prácticas. Estas constarán de visitas, obradoiros de exercicio físico e mesmo un taller onde farán a simulación dun xuízo.

A inscrición, que é gratuíta, pódese formalizar ata o día 2 de marzo de xeito online a través do espazo web UDC Sénior As Pontes, ou presencialmente na secretaría de alcaldía do Concello pontés.

Os temas nesta quinta edición serán variados e diferentes aos das anteriores, o que fai que cada unha delas sexa única e que aquelas persoas que queiran poidan repetir se así o desexan.

Unha das alumnas do anterior programa foi Charo Cuba, pontesa de 71 anos que se apuntou "xa na primeira, pero as prazas foron a sorteo e non entrei". Comezou  na segunda e chegou ata a cuarta, mais a esta non poderá asistir "porque non me coinciden ben os horarios".

"É a un sitio ao que vas aprender por gusto, é unha maneira de saír da casa e de socializar, moi recomendable", apunta, mentres di que lle gustaría "un programa estable con clases todo o curso".

A tamén pontesa Miri Franco,  de 58 anos, participou nas catro edicións —polas que pasaron ao redor de 220 alumnos—, e vaino facer tamén na que comezará en marzo. "Cando me decatei de que iamos ter o privilexio de dispoñer dun recuncho da universidade alegreime moito, son unha persoa curiosa e aberta a novas experiencias de aprendizaxe", expón, á vez que di que foi iso o que a levou a apuntarse, e destaca que "os mestres están moi implicados".

Unha oferta que pensa na cultura e no día a día

As materias ofertadas pola universidade para maiores en Vilalba, Xermade e As Pontes son variadas e útiles na vida cotiá. A pesar desta similitude, cada aula conta con programas diferenciados, con actividades e temas propios, se ben están todos enfocados cara a un mesmo propósito. Este non é outro que «o envellecemento activo», tal e como expoñen Tania Pardo, responsable de Benestar Social do Concello das Pontes, e Luis Rodríguez Patiño, coordinador da Uned Sénior Terra Chá-Eume.

Guitiriz
Este ano, a Uned Sénior oferta dúas materias en Guitiriz: inglés e música. Esta última conta cunha gran variedade de instrumentos como gaita, pandeireta, acordeón ou bombo, entre outros. 

Xermade
Na aula de Momán, en Xermade, impártese tamén música, así coma medicina, informática e historia de Galicia. Nesta os alumnos fan viaxes a distintos puntos de interese da comunidade para coñecer o pasado e a algunhas persoas máis sobranceiras desta.

As Pontes
Na Universidade Sénior das Pontes, os seminarios impartidos correspóndese con tres grandes temáticas, que son arte e humanidades, ciencias xurídicas e sociais e ciencias da saúde. Nelas, algúns dos temas a tratar serán Édouard Manet, a xeobotánica, ou como poñerlle cordura á alimentación e ao exercicio físico.

Comentarios