O rexedor de Xermade, Roberto García Pernas, herdou de seu pai o gustou polo labor político, unha vocación que dende o 2007 compaxina co seu traballo de axente medioambiental, un cometido que desenvolve dende hai 33 anos, a última década na zona de Ferrol, Eume e Ortegal. Os últimos catro anos fíxoo como alcalde socialista en minoría, unha posición que o levou a estar sen cobrar os últimos tres anos, ao prosperar unha emenda da oposición que o deixaba sen soldo, e que vén de anular o TSXG.
A sentenza condena ao Concello a pagarlle os atrasos da dedicación parcial, 1.600 euros brutos ao mes, como o fai sentir a resolución?
Estou contento porque se fixera xustiza, porque sempre dixen que un alcalde debe cobrar. É un traballo de responsabilidade. Xa dixen que me paguen como consideren oportuno, como sexa menos lesivo para o concello, o que non quero é crear un problema. Pero aínda que a sentenza fose contraria, eu volvería a repetir sen cobrar, porque o diñeiro non é o que me move, a política ten que ser vocacional.
Que balance fai deste mandato?
Positivo. Teño unha boa relación cos veciños e tento gobernar para todos e distribuír os recursos de maneira equitativa, resolvendo os problemas e as prioridades.
Que actuacións destacaría?
Un pouco de todo. Fixemos unha aposta importante no arranxo de estradas, con ao redor dun millón de investimento; promovemos o cambio do alumeado público a led, con actuacións en Roupar de Arriba, Cabreiros, Candamil, Xermade ou Momán, e tamén en 370 puntos das aldeas; creamos parques infantís en Momán, Candamil e Piñeiro; tres depósitos de auga para ganderías e incendios en Roupar, Cazás e Burgás e outro de auga potable en Burgás; melloramos a traída para evitar fugas; contratamos a 48 persoas, incrementamos o SAF, etc.
Tamén ampliaron o parque de maquinaria, por que?
Si, temos dous tractores con catro desbrozadoras, unha retroexcavadora, un cortacéspede, un coche e queremos comprar un pisón. É importante ter medios propios para facer pequenas obras e solucionar emerxencias sen depender de contratacións. Tamén nos deron un vehículo para Protección Civil. Temos un equipo de voluntarios que funciona moi ben.
E que lle gustaría ver feito?
A estrada LU-170, de Cabreiros a Momán, porque é fundamental para o desenvolvemento económico do concello e, concretamente, para o do polígono, que hoxe está paralizado pola falta de accesos.
E a das misas, de Momán ao polígono pontés dos Airíos?
Non vai estar ao acabar este mandato, pero si nos próximos anos. Hai xa catro quilómetros feitos, tres máis adxudicados e quedan 2,5 pendentes. A Deputación tamén ten adxudicada a de Candamil a Xermade e a de Roupar de Arriba a Roupar de Abaixo.
Levan varios anos a recuperar a Casa da Neveira, que supón este traballo para Xermade?
O campo internacional de traballo, igual que o premio Xermade na Historia ou as Xornadas Interxeracionais de Cabreiros axudan a recompilar información moi valiosa sobre o municipio e son un reclamo. A Neveira además está preto do que esperamos que sexa un gran atractivo, o centro de interpretación etnográfico do Batán de Folgoso, do que xa se acabou a primeira fase e se vai levar a cabo unha segunda. Recupéranse o batán e o muíño de Folgoso, o muíño e a moa de Orxás ou a planta de luz de Vieiro. E ademais por alí pasa unha ruta de sendeirismo, que coma a do Trimaz que se está acondicionando agora, son un grande atractivo porque discorren por paraxes de frondosas e mananciais.
E teñen o Encontro de Torneiros.
É un dos principais eventos de Xermade, cun gran prestixio e recoñecido entre os mellores de España. Ten gran afluencia de xente e categoría nos participantes. O Concello colabora coa organización no posible para que siga a ser un referente mundial da tornería.
Xermade perdeu uns 450 veciños na última década, que pode facer o Concello contra este fenómeno?
Tentar crear emprego, atraer emprego e poñer en valor os recursos que temos no rural. Tamén agrupar fincas e transformar montes para uso agrícola e forestal.
Que foi o que máis o sorprendeu de ser alcalde?
A lentitude das administracións, a burocracia que hai que seguir, como ter que esperar un ano por un permiso, e a limitación orzamentaria, que deixa pouco marxe para facer obras e investimentos. Grazas á axuda da Deputación, que apostou por colaborar co concello, puidemos facer cousas, porque a Xunta só nos dá o que corresponde. Creo que tamén tería que ter un plan único ou algo así.
E que destacaría do cargo?
O trato cos veciños de Xermade, son encantadores. Estou moi contento co trato que me dan, é xente nobre coa que dá gusto traballar. E o mesmo podería dicir do persoal do concello, dos funcionarios.
Que o leva a repetir como cabeza de lista?
Considero que nun mandato non se dá desenvolvido o proxecto dun alcalde e dun equipo de goberno. Teño ganas de seguir facendo cousas para os veciños de Xermade, aos que me debo.
Xa teñen decidido quen o acompañará na candidatura?
Estamos traballando na lista e algún cambio vai haber. Teño que agradecerlle ao equipo de goberno a súa dedicación e responsabilidade e o seu traballo altruísta, porque non cobra ningún.
A que lle gusta dedicar o seu tempo libre?
Cando teño tempo gústame pasear, ir bailar e a gastronomía, degustar produtos típicos da nosa terra. Tamén aproveito para compartir coa familia e cos amigos os poucos momentos que me quedan para eles.
Emprego
O sector servizos é o máis relevante, con 317 afiliacións a decembro de 2018, seguido do primario, con 173, a industria (104), e a construción (58).
Economía
En Xermade había en 2017, segundo o Ige, máis de 200 ganderías de vacún, que superaban as 8.000 cabezas. No tocante ás empresas, das 239 existentes, a maioría están relacionadas co sector primario e un total de 225 teñen menos de dous asalariados.
166,3
Son os quilómetros cadrados que abrangue o municipio xermadés, lindando cos concellos chairegos de Guitiriz, Muras e Vilalba e cos coruñeses de Monfero e As Pontes.
