A Feira de Santos contou este sábado con milleiros de visitantes que encheron Gontán para gozar dunha mañá con ambiente festivo na que os animais e a comida foron os dous maiores reclamos, seguidos dos habituais postos polas rúas.
Esta edición foi especial polo feito de significar a volta á normalidade despois duns anos nos que a tradicional cita de Abadín estivo marcada polo coronavirus. En 2020 non houbo e en 2021 contou con medidas especiais.
O concurso de gando que promove o Concello de Abadín tivo como premiados a Rocío García Seijo polo maior número de vacas; a Orlando García polo mellor equino de silla; a Manuel Rego polo premio local de silla; a Celsa Balsa pola mellor egua e a Luz Divina Amado pola segunda mellor; a Manuel Seijo pola mellor cría equina e a José Ramón Ares pola segunda mellor.