Elba Veleiro: "A alcaldía non é moi distinta á consulta"

Chegou a Vilalba como médica de familia e botou case 40 anos na súa consulta, cunha media de 1.400 tarxetas —levaba dez anos co cupo pechado— e chegando a atender a varias xeracións da mesma familia. Acaba de estrear os 65 anos, pero aínda non pensa na xubilación, ilusionada co seu novo labor na alcaldía, á que se dedica en exclusiva e coa idea, polo menos de momento, de prorrogar a súa excendencia.

Bota de menos a consulta?

Non, porque tras 39 anos vén ben unha paréntese, pero se tivese que volver, incorporaríame sen problema. A verdade é que a alcaldía non é moi distinta da consulta, o único que non fago é receitar.

A alcaldía parécese á consulta?

Non hai moito cambio porque o primeiro é o contacto coa xente, escoitar os seus problemas, preocupacións, alegrías. É Facer unha diagnóse e aplicar un tratamento ou solución, ás veces definitivo, outras paliativo. O que é novo para min é a parte institucional e a relación con outras administracións.

A xente segue a preguntarlle cuestións médicas?

Moi poucas, algunha vez e máis na rúa ca no concello, onde pode pasar excepcionalmente con algunha persoa que vén facer algunha dilixencia. Ás veces son pacientes meus e son eu a que lles pregunto como van.

"A nosa idea é deixarlle ás seguintes xeracións unha vilalba habitable e fermosa, con condicións de benestar"

Tras doce anos na oposición, resultoulle doada a transición ao goberno?

O maior atranco que atopamos é que moitas veces non están reflectidos por escrito convenios ou decisións. Había cousas apalabradas das que non hai rexistro e témolas que rexeitar ou tentar solventalas se é posible.

Que é o primeiro que fai ao entrar na oficina? A que hora chega?

Mirar a axenda e se teño algo para firmar. Veño sobre as 9.00 e estou ata as 15.30 ou algo máis e moitas veces volvo pola tarde se teño concertadas reunións. Iso cando non teño que viaxar ou ir chamar as portas doutras institucións.

Que foi o mellor e o peor ata o de agora?

O mellor momento foi o 15 de xuño, cando tomei posesión, e o máis duro que unha veciña, Mari Carmen Vázquez, fose vítima dun asasinato machista.

Que balance fai destes meses?

Positivo. Tivemos moito traballo no día a día, porque Vilalba é un concello cun peso importante e con moitas necesidades, por estrutura, por extensión xeográfica, polo número de parroquias, con moitos núcleos, e pola poboación rural, moi envellecida, aínda que teño que dicir que o índice de natalidade está estabilizado. Temos tamén un sector agrogandeiro potente e un polígono industrial que afortunadamente ten actividade e nós aspiramos a que se amplie en solo e en número de empresas. Dende o equipo de goberno estamos a traballar con ilusión dende o primeiro día co obxectivo de consolidar aquilo que está ben e cambiar a liña ideolóxica, porque para iso nos votaron os cidadáns.

"No rural pídennos actuacións en vías, máis puntos de luz ou que se axilice a recollida de voluminosos ou plásticos"

Que necesita Vilalba?

Dende a oposición criticabamos a parálise do anterior goberno porque o que cremos que necesita Vilalba é dinamismo. As actuacións que se fagan deben ir dirixidas ás persoas e ás veces cando se fai unha actuación urbanística só se pensa no tráfico, cando tamén hai peóns. A ninguén se lle escapa que o cambio climático é unha realidade e a nosa idea é deixarlles ás seguintes xeracións unha Vilalba habitable e fermosa, con condicións de benestar para a cidadanía.

Encaixa nesa idea a peonalización puntual da Rúa da Pravia ou a longamente debatida da Praza de Santa María?

Na Praza de Santa María hai que deixar paso a vehículos, pero si queremos eliminar o aparcamento buscando unha alternativa próxima e niso estamos a traballar. Tamén proxectamos humanizar a Avenida da Terra Chá e o contorno do auditorio e queremos poñer en valor o Camiño de Santiago, porque pode xerar ingresos e dar a coñecer Vilalba e os seus produtos emblemáticos, sobre todo agora co Xacobeo 2021.

Que lles piden os veciños?

No rural os particulares piden sobre todo actuacións en vías, porque a rede é moi extensa, está en malas condicións e a climatoloxía adversa non permitiu facer arranxos e incrementou as desfeitas. Tamén piden puntos de luz ou que se axilice a recollida de voluminosos ou plásticos ou melloras na recollida do lixo, un contrato que leva 20 anos e temos que renovar agora. Mentres, as asociacións piden apoio económico para desenvolver actividades.

Cales son as súas prioridades á hora de actuar?

Responder ás necesidades dos veciños e darlles voz, xestionar da mellor maneira posible os cartos públicos e ofrecer igualdade de oportunidades en todos os eidos. No tocante a proxectos esperamos buscarlle a mellor solución á infrautilizada estación de buses. Hai opcións, pero a nosa idea é poñer alí un centro de día, sen deixar desantendido o servizo aos viaxeiros. Adxudicamos o SAF, estamos traballando nunha solución definitiva para o Madrugadores de cara ao próximo curso e temos outros proxectos pensados para mellorar a vida dos vilalbeses.