A Garda Civil detivo a catro persoas de nacionalidade rumana que supostantemente entraron pola forza na vivenda duns compatriotas e os agrediron, ademais de roubar cartos e diversos obxectos. Os presuntos asaltantes pasaron este mércores a disposición xudicial no Xulgado de Instrución Número 1 de Vilalba, acusados dun delito de roubo con violencia e intimidación.
Segundo apuntaron fontes da investigación, os catro acusados acudiron a un piso no que estaban os dous homes e, para acceder ao mesmo, golpearon a porta ata lograr forzala. Unha vez dentro golpearon aos inquilinos e fixéronse cun botín duns mil euros e con varios obxectos.
Os dous agredidos foron evacuados ao PAC vilalbés, desde onde os derivaron ao Hula, dada a gravidade das feridas. Un deles presentaba cortes na cabeza que precisaron puntos de sutura e o outro numerosos golpes.
Ao parecer, foi un dos agredidos o que acudía ao redor das nove da noite ao posto da Policía Local de Vilalba para dar conta de que catro individuos o atacaran no seu piso. Os axentes municipais alertaron á Garda Civil, que mobilizou varias patrullas para dar cos agresores.
A investigación por estes feitos está aberta e apunta a algún tipo de discrepancia entre os implicados, se ben se cre que non se trata dun axuste de contas relacionado con algunha actividade ilícita.
Por outra banda, a Garda Civil tamén tivo que acudir a un bar vilalbés onde un cliente iniciaba unha trifulca na que causou danos materiais. O estado do home levou aos alí presentes a alertar ás forzas de seguridade.
