Descobren un bronce de 2.300 anos de antigüidade no castro de Viladonga

Trátase dunha machada votiva de 13 centímetros e 22 gramos de peso
A peza de bronce achada en Viladonga. EP
photo_camera A peza de bronce achada en Viladonga. EP

As escavacións no castro de Viladonga, no municipio lucense de Castro de Rei, permitiron localizar unha pequena machada votiva de bronce asociada a rituais de sacrificio e que ten uns 2.300 anos de antigüidade. 

Segundo informou a Xunta, a peza, de 13 centímetros e 22 gramos de peso, foi atopada nas escavacións arqueolóxicas impulsadas polo Goberno galego na campaña 2019-2020, durante os traballos no alxibe monumental. 

En concreto, no fondo, sobre as escaleiras de acceso ao depósito, apareceu unha peza de bronce asociada a outros materiais, principalmente cerámica, ósos e restos de carbón. As análises do material orgánico recollidas na campaña anterior confirmaron que se trataba dunha construción castrexa prerromana do século III a.C., anterior por tanto á construción da muralla do poboado. A peza poderá ser contemplada en breve no museo do castro. 

Os expertos apuntan á importancia deste descubrimento "pola escaseza destas pezas e a súa profusa e complexa decoración". Aínda que non é a primeira vez que se atopan machadas de sacrificio en Galicia, trátase da que ten, polo momento, unha decoración máis rica. 

No colgante desenvólvense moitos dos elementos comúns a estas pezas, como a propia machada, os sogueados ou o torques, ademais dun prótomo de touro, un xabaril na zona mesial, e un prótomo de carneiro na zona distal. 
O colgante está relacionado con ritos de sacrificio desenvoltos na segunda Idade de Ferro no noroeste peninsular e enriquece o material localizado no Castro de Viladonga.

UN DOS XACEMENTOS MÁIS SINGULARES. O Castro de Viladonga é un dos xacementos arqueolóxicos máis singulares de Galicia, un dos máis coñecidos polo público e tamén un dos que recibe un maior número de visitas. 

O conxunto arqueolóxico e museístico ocupa o cume dun monte desde o que se contempla a Terra Chá lucense e as serras de Monciro, de Pradairo e Meira. A importancia arqueolóxica e o interese histórico de Viladonga púxose de relevo por mor das escavacións iniciadas en 1971, tanto pola monumentalidad e diversidade das estruturas descubertas, como pola cantidade e calidade dos materiais recollidos.