lunes. 18.11.2019 |
El tiempo
lunes. 18.11.2019
El tiempo

Contos de avespas e abellas

Integrantes de Titiriterra. EP
Integrantes de Titiriterra. EP
A nova compañía de títeres, con sede en Sistallo (Cospeito), estrea a súa primeira obra, 'Belarmina, a fabulosa velutina', hoxe ás 18.00 horas no auditorio de Vilalba, no marco do ciclo de teatro profesional Proscenio, promovido pola área de Cultura da Deputación

Hai xusto un ano, un encontro casual nunha gasolineira levou a converxer os intereses e habilidades artísticas dos tres pés que forman a nova compañía teatral Titiriterra: Martín Vázquez, Verónica Quintela e Gustavo Fouce.

Gustavo, que se está a mudar a Sistallo (Cospeito) —onde asentaron Titiriterra—, estudou Inef e Arte Dramática. Pechado o seu ciclo na compañía Nasdrovia, andaba a buscar alguén que fixese títeres e recomendáronlle a Verónica Quintela, enxeñeira forestal de profesión e ideadora e manufactureira, por vocación, de cabezudos —fai todos os anos para o San Xoán de Sarria, de onde é—, bonecos ou cerámica.

Malia a que Gustavo xa solucionara, fixeron por quedar igual e a ese encontro Verónica levou unha marioneta que tiña feita dunha vella. E Gustavo tívoo claro ao vela. Pensou: "Podemos facer algo". A el xa lle rebulía na cabeza a idea de centrar unha obra nun animal "de moda", a avespa asiática. "A partir de aí, todo foi ensaiar, argallar e discutir un pouco", resume Gustavo sobre unha idea que foi medrando pouco a pouco e un proceso creativo que se prolongou durante meses ata darlle forma a 'Berlamina, a fabulosa velutina', a historia dunha avespa que non recoñece a súa condición, polo que pon todo o seu empeño en trabar amizade cunha abella un tanto "roñica". Dúas especies enfrontadas que, porén, a xente non sempre sabe distinguilas.

Naquela xuntanza, que supuxo a semente dun froito que se poderá ver esta tarde no auditorio Carmen Estévez de Vilalba e o vindeiro 30 de decembro en Monforte, tamén estaban outras dúas pezas clave de Titiriterra: Martín e o seu trombón. Natural de Lugo e afincado en Sarria, este músico de corazón e de dedicación —é membro de Louband e mestre nas escolas de música de Rábade e de Paradela, onde tamén dirixe a banda— comparte vida e tamén escenario con Verónica. Non só son os encargados de darlle vida aos títeres, senón que tamén son personaxes dunha peza na que a música é un ingrediente esencial.

Os dous, din, levan ben todo o traballo que conleva crear as personaxes, os ensaios, as decisións creativas... "É unha aprendizaxe grande e enriquecedora", aseguran. "Cando nos atopamos, interesábame que non tivesen demasiada experiencia", apunta Gustavo, director e coautor da música dunha obra na que, como precisa Martín, apostaron porque o lado artístico, ademais do propio entretemento, tivese peso.

Tamén preferiron darlle forma a "unha peza sinxela, que se poidese levar a calquera sitio, sen perderse na escenografía", explica Gustavo, convencido de que os dous títeres de bocón "son o suficientemente bonitos e complexos en textura e en expresión" para levar todo o peso dunha montaxe dirixida "a todos os públicos". E aínda que xa fixeron algunhas probas con audiencia, confían na resposta que lles ofrezan os nenos e as nenas en Vilalba. Porque o público infantil, asegura Gustavo, é "moi esixente e moi sincero".

Contos de avespas e abellas
Comentarios