jueves. 21.10.2021 |
El tiempo
jueves. 21.10.2021
El tiempo

Oito concellos únense para pór en valor a ruta Vilalba-Betanzos

Participantes, no acto de sinatura celebrado no Cine Alfonsetti de Betanzos. EP
Participantes, no acto de sinatura celebrado no Cine Alfonsetti de Betanzos. EP
Os peregrinos deste tramo do Camiño Norte orixinal xa poden obter a Compostela

O Concello de Betanzos impulsaba hai un tempo un importante labor de recuperación e de documentación do Camiño Norte orixinal entre Vilalba e Betanzos, unha iniciativa que este sábado daba un paso fundamental coa sinatura dunha declaración de intencións por parte dos alcaldes e alcaldesas dos oito concellos polos que pasa esta ruta xacobea, entre eles Vilalba, Guitiriz e Xermade.

A través deste documento, os asinantes, entre os que tamén figuran os muncipios coruñeses de Monfero, Aranga, Paderne, Irixoa e Betanzos, comprométense á posta en valor deste percorrido e á súa conservación en bo estado.

"A recuperación do tramo Vilalba-Betanzos supón a lexítima restauración dun patrimonio histórico de primeira magnitude e de importancia estratéxica", reza a declaración, que fai fincapé no documento expedido o 15 de xullo de 2021 polo director da Oficina do Peregrino, o guitiricense Segundo Pérez, en representación do Cabildo da Catedral de Santiago, "no que se concede a Compostela a todos os peregrinos que, seguindo o tramo Vilalba-Betanzos e cumprindo as condicións acostumadas" cheguen á capital galega.

"Durante séculos os peregrinos camiñaron polos nosos concellos (...) deixando unha fonda pegada que aínda perdura, atravesaban a Terra Chá ata a Serra da Loba"

O texto suscrito recorda que as investigacións levadas a cabo permitiron confirmar que o Camiño Norte orixinal "viña e vén paralelo ao mar Cantábrico e entraba e entra en Galicia por Ribadeo, pasando logo por Mondoñedo, Vilalba e Betanzos" e avanza que se buscará o apoio de entidades públicas e privadas para a súa potenciación, así coma da Xunta para que "culmine este proceso cun recoñecemento oficial que garantice a plena protección deste tramo".

"Durante séculos os peregrinos camiñaron polos nosos concellos (...) deixando unha fonda pegada que aínda perdura, atravesaban a Terra Chá ata a Serra da Loba", destácase tamén nun documento no que os asinantes se comprometen a "promover as medidas necesarias para sinalizar e manter os camiños en bo estado, así como a atraer e acoller coa maior hospitalidade aos peregrinos e demais camiñantes".

No acto, a alcaldesa de Guitiriz, Marisol Morandeira, salientaba a relevancia de valorizar o Camiño, no que "todas as variantes teñen cabida" e de que os veciños lle teñan "apego", amosando o seu agradecemento a todos os implicados "nesta aventura", especialmente a Segundo Pérez -presente xunto a unha representación da veciñanza que solicitara o recoñecemento- por ser "peza clave para articular esta declaración".

O rexedor xermadés, Roberto García, sinalou a importancia dunha iniciativa que "favorecerá a economía da zona rural e dinamizará os concellos", mentres que a alcaldesa de Vilalba, Elba Veleiro, fixo fincapé na "total disposición e máximo empeño" do municipio do que parte o itinerario en apoiar esta "interesante proposta".

Oito concellos únense para pór en valor a ruta Vilalba-Betanzos
Comentarios