sábado. 27.11.2021 |
El tiempo
sábado. 27.11.2021
El tiempo

RECUNCHOS A DESCUBRIR

Charca dos Patelos: Augas sanadoras nun roteiro xermadés con historia

Charca dos Patelos, en Candamil. MARTA MANCEBO
Charca dos Patelos, en Candamil. MARTA MANCEBO
Este manancial, un dos principais elementos da Ruta dos Pasos da Pontenova, foi construído no lugar dunha antiga fonte en Candamil á que acudían os antergos polas súas propiedades curativas
PATELOS PONTENOVA CANDAMIL 17O lugar
No quilómetro 11 da LU-861 hai que coller a estrada que conduce a Xermade, despois duns metros aparece unha pista á man esquerda que dá acceso á charca. A zona está rodeada dun peche de chantos.
Parada obrigada
Este reclamo, que pertence á parroquia de Candamil, é unha das paradas obrigadas da Ruta dos Pasos da Pontenova, un pequeno roteiro circular de apenas 600 metros.
Patrimonio etnográfico
Dentro da camiñata, tamén se pode contemplar o Cruceiro do Barro, que foi colocado pola familia do mesmo nome, natural de Burgás.

As propiedades curativas dunha antiga fonte de Candamil, á que os antergos se achegaban regularmente para empregar o líquido que manaba dela para lavarse e mellorar así os seus problemas de pel, entre outras utilidades, é a orixe da Charca dos Patelos.

PATELOS PONTENOVA CANDAMIL 14Este manancial, próximo ao río Trimaz e ao LIC Parga-Ladra-Támoga, ofrece un espazo para mollarse, pero tamén conta cunha ampla zona recreativa e de ocio, con varias mesas para merendas, e rodeado todo dunha frondosa e fermosa vexetación.

Esta charca, creada para o goce dos veciños e dos visitantes, é un dos elementos principais dun roteiro de algo máis de medio quilómetro que conduce ao camiñante a outro curioso enclave.

Os pasos da Pontenova é unha antiga obra civil creada hai moitos anos para sortear as augas do Trimaz nas épocas de enchente, e que tamén axudaba a enlazar as parroquias de Candamil e de Burgás, ademais de dar paso a outros moitos lugares. PATELOS PONTENOVA CANDAMIL 5

Por ese remoto camiño empedrado sobre as augas, que tamén está cheo de natureza virxe, transitaban animais, persoas e ata carros, e agora poden seguir facéndoo todos aqueles curiosos que queiran descubrir este chamativo recuncho xermadés.

Charca dos Patelos: Augas sanadoras nun roteiro xermadés con historia