Natural de labrada, a poeta Branca Villar, integrante de Nova Poesía Guitirica (NPG), ofrecerá un novo servizo de visitas guiadas para dar a coñecer os frescos da igrexa.
Como xorde esta iniciativa?
A través dunha conversa co cura, Luis Ángel Rodríguez Patiño, e por un interese común polo patrimonio cultural. A historia dos frescos é unha historia que coñezo ben porque meu pai foi o descubridor nos anos 90. Estaba aburrido e nunha homilía longa púxose a rascar a parede cunha chave do coche e apareceu un pequeno tesouro.
Os frescos... Que destacaría?
Son moi particulares, enmarcados en cenefas. Crese que son de mediados do século XVI e son moi raros. Quizais un dos máis particulares é o do inferno, representado nun pote cos sete pecados capitais.
Pediuse en moitas ocasións a súa restauración.
Fíxose unha hai anos pero deberíase facer outra máis a fondo. A humidade afecta moito e cremos que podería haber máis dos que se ven hoxe.
O servizo de visitas aínda non comezou. Como se farán?
Son visitas guiadas para as que hai que concertar cita. É a primeira vez que se vai facer algo así e se funciona poderíase ampliar a outros puntos da zona. Os interesados deben chamarme ao número 622.55.47.73 para fixar día e hora.
Canto durarán?
O tempo iremos vendo. Haberá primeiro unha aproximación histórica á zona para entrar en contexto. Por tema covid deberán ser grupos reducidos e haberá que cumprir todas as medidas. Pero creo que é unha visita moi interesante.
Son gratuítas as visitas?
En principio ímolas facer sen cobrar, sería o que a visita nos quixese dar. Temos que probar como funciona e logo ao mellor buscar algún tipo de acordo co Concello.
Son dirixidas a veciños ou máis para xente de fóra?
É unha visita para todo o mundo e todos son benvidos. Tampouco hai problema se hai que traducir ao inglés.