A distribución de fondos que fai a Deputación de Lugo entre todos os concellos da provincia a través do plan único conta con varios apartados, entre eles un de fomento do emprego, que neste 2021 supuxo a achega de 563.802,97 euros a unha decena de municipios da zona, que con estes fondos puideron contratar de xeito temporal a máis dunha trintena de persoas en total.
Os concellos teñen a liberdade de repartir o seu orzamento en función das necesidades, con contratacións a xornada completa ou parciais ou apostando por ter máis persoal menos tempo ou ao revés, ampliando a duración pero reducindo o número de operarios.
O posto de traballo estrela, presente practicamente na totalidade destes municipios e en varios mesmo en exclusiva, é o de peón de obras públicas ou de servizos múltiples, con máis dunha vintena de contratacións deste tipo, por periodos que van dende os cinco meses de Begonte ata os doce de Meira.
Dende os concellos precisan que este perfil axuda a levar a cabo moitas actuacións municipais, especialmente naqueles que dispoñen de pouco persoal. Entre os que optaron por contratar só peóns figuran Begonte, con seis; Xermade e Castro de Rei, con catro; A Pastoriza, con tres; Cospeito, con dous; e Meira, con un.
Nove concellos apostaron por contratar peóns e seis deles optaron só por este perfil, por periodos que van dos cinco meses ata o ano
Tamén hai operarios de servizos múltiples en Vilalba (dous), e en Guitiriz e Ribeira de Piquín (un), compaxinado con outros perfís laborais.Así, en Vilalba foron seis os contratos totais, sumando tamén un xardineiro, un administrativo, un técnico en xestión e un electricista.
Os tres postos creados en Guitiriz complétanse cun conserxe-condutor e cun administrativo e en Ribeira de Piquín quíxose contar cun oficial de cantería. No tocante a Muras, contratáronse por nove meses un técnico de turismo e un axente de desenvolvemento local, mentres que Abadín e Pol son os únicos concellos da zona que non contan con axudas nesta liña do plan único.
AS PONTES. No Concello das Pontes contratáronse este ano a través do PEL da Deputación da Coruña un total de 19 peóns, que operan en dúas quendas, con contratos de seis meses de duración. A achega provincial este ano é de 92.000 euros.
