O alumnado de secundaria do IES Pedregal de Irimia conmemorou o Día da Felicidade cun proxecto interdisciplinar que culminaba cun acto no centro sociocomunitario da vila.
O acto inaugurábase cun reparto de chapas distribuídas aleatoriamente, cada unha cunha mensaxe dun estudante que recollía a súa visión da felicidade, e pechábase coa interpretación da Rianxeira. No medio, tocaba emocionarse, rir e mesmo soltar algunha bágoa coa culminación desta entrañable iniciativa que implicaba tamén a nove usuarios, con idades comprendidas entre os 63 e os 91 anos, do Centro de Atención a Maiores (CAM) de Meira.
"Foi moi agradable e moi emotivo, non se acordan de todo, pero si de cousas moi especiais, e é moi bonito ver como se coidan uns a outros e o amigos que son entre si, ver o compañeirismo e como resolven as pequenas discusións que poidan ter con tranquilidade", aseguran Zoe e Victoria, dúas das alumnas de terceiro de secundaria que participaron directamente nas recompilacións das historias de vida de cada un dos maiores.
A vintena de alumnos de terceiro repartíronse en grupos e achegáronse á residencia para falar con Sergio, Rosa, Paco, María Luisa, Clotilde, Isidoro, Manuel, Obdulia e Mari Carmen, dos que despois fixeron presentacións contando a súa infancia, profesión... facendo especial fincapé no talento que os caracteriza, coma a música, a lingüística, a habilidade artística...
Recibiron ademais cadanseu agasallo, unha sorte de diploma conmemorativo personalizado, e ofreceron a súa versión do que é a felicidade, na que a mensaxe era común: a familia.
