Dar coa área recreativa do río Arnela non é sinxelo. Está nos cumios de Castromaior, en Abadín, e a ela chégase seguindo a N-634 ou a A-8, para logo coller a estrada LU-P-0108. A uns tres quilómetros da igrexa hai que tomar unha pista á esquerda que leva monte adentro. As coordenadas son N 43º 22’ 40.1’’ W 7º 31’ 35.0’’.
Creación
O Concello encargouse de levantar unha cabana, mesas e bancos de pedra e unha pasarela entre os anos 90 e os 2000. As brigadas desbrozan a contorna no verán.
Pernocta
Na casiña de madeira pode pernoctar quen o desexe, previa solicitude nas oficinas municipais. Dispón de cociña-sala, baño e habitacións, aínda que non están equipadas con mobiliario, salvo armarios.
No máis alto de Castromaior, alá onde os lindes tocan coas veciñas parroquias de Candia, Fanoi e Labrada, está o monte de Toxoso e nel, un río que nace preto e baixa apurado. Mais no treito que hai entre a súa orixe, das escorreduras dos cumios que o rodean, e a desembocadura no río de Abadín, ao Arnela dálle tempo a ofrecer pequenas fervenzas e unha especie de descanso que fai as veces de zona de baño.
Manuel Regal naceu en Chantada, pero xa hai moito que fixo de Candia o seu fogar. O seu amor polo monte, polo agreste e por andar levouno en moitas, moitísimas ocasións, á área recreativa do río Arnela, onde hoxe se escoitan os ecos daquela algarabía de hai anos, cando familias, mozos e nenos se reunían á beira das súas augas para merendar, xantar ou para desfrutar dos días de verán.
"É un sitio ideal para vir cuns amigos, unhas empanadas, bañarse e pasar aquí o día", di Manuel, armado con botas altas e unha vara que facilita a andaina pola área. Porque aínda que na súa hora foi epicentro das diversións en Abadín —alí fixéronse sardiñadas veciñais, houbo sesións de orientación e acolleu excursións de pequenas e pequenos—, o tempo fixo das súas, deteriorando algunhas das mesas e a ponte que cruzaba o leito do río.
Malia todo, segue merecendo a pena subir monte arriba —pertence á comunidade de Castromaior—, observar as greas de cabalos, albiscar os confíns da Terra Chá e poñer os cinco sentidos na contorna do Arnela, onde, ademais, hai moito de historia.
Preto das fervenzas do río hai unha pena á que se lle coñece como O Castelo, lugar no que se advirten uns relevos que se atribúen a un posto de control no camiño que ía da comarca chairega ao Xistral e máis ao norte, enlazando co Camiño Real de Mondoñedo a Ferrol. Pero respecto ao Castelo non hai nada estudado, aínda que se supón que a súa historia vai varios séculos máis atrás.
Un pouco adiante está a Cabana do Capitán, "onde queda a base dunha pequena construción que pode ter que ver coa outra construción defensiva da pena", explica Manuel, que anda montes na busca "de paz, vistas e paisaxes" e atopou no Arnela un dos seus lugares aos que sempre volver.