O CIFP POLITÉCNICO de Lugo continuará ofertando o vindeiro curso académico 2022-2023 todas as modalidades da Formación Profesinal (FP) e incorpora ademais importantes novidades, entre as que destacan o Ciclo Superior de Integración social, o Ciclo Medio de Construción (primeiro), o CS de Proxectos de Edificación (primeiro) o Ciclo Superior de Construcións metálicas e o CM de elaboración de produtos Alimentarios (primeiro).
Novas instalacións
Carpintaría e moble, pola súa banda, trasládase desde a súa anterior ubicación na sede da Fundación Laboral da Construción en Lugo ao CIFP Politécnico, un edificio construído en madeira que cumpre os obxectivos que se establecen para mellorar o rendemento académico, a creatividade e a autonomía de alumnos e alumnas. Estas melloras conséguense nas novas instalacións grazas a unha dotación cun amplo espazo, gran iluminación e climatización adecuada.
O novo espazo educativo cumpre cos requisitos necesarios para impartir os ciclos da familia profesional de madeira, moble e cortiza que se ofertarán a partir do curso que vén e que contribuirán ao desenvolvemento de profesionais cualificados para a ocupación de postos de traballo especializados nas industrias da carpintaría e moble. Estes traballos abranguen dende carpinteiro, operador de máquinas ou instalador ata vernizador e lacador.
Para conseguir os obxectivos cóntase cunha aula de informática onde o alumnado a pé de taller imprime os planos e patróns para comprobar as medidas e fabricar os mobles e os produtos de carpintaría. Ademais o taller está equipado con ferramentas e maquinaria de recente adquisición e os últimos avances tecnolóxicos, como CNC, láser e impresión 3D, que fan da aprendizaxe do alumnado unha experiencia onde a imaxinación non ten límites.
Este tipo de aulas son chaves para un ambiente educativo de calidade. Ao mesmo tempo actúan como un elemento de progreso da actividade didáctica e fomentan a creación de actividades propias do centro, como o programa Lanzadeiras Lugo, proxectos de innovación e competicións.
Este ano os alumnos e alumnas do CIFP Politécnico crearon a miniempresa Haros, na que deseñan e elaboran logotipos, calculan orzamentos e posteriormente fabrican chaveiros de diversos materiais tales como madeiras nobres, taboleiros, coiro ou metacrilato. Así mesmo participaron en competicións como Galicia Skills, na que, grazas a eles, o centro lucense quedou campión galego na especialidade de Ebanistería e posteriormente participou no campionato de España, Spainskills.
Os diferentes ciclos inclúen formación en centros de traballo da provincia
Tecnoloxía aplicada: Aula 4.0
O centro lucense conta cun Espazo de Tecnoloxía Aplicada, a Aula 4.0, pensada para dar a coñecer, estudar, experimentar, descubrir e demostrar aspectos da Industria 4.0, simulando as contornas laborais.
Dispón de recursos didácticos reais e virtuais, e soporte lóxico de simulación e xeración de xemelgos dixitais. Permite traballar nas principais áreas tecnolóxicas da dixitalización da industria, centrándose principalmente nas seguintes liñas temáticas:
- Robótica Colaborativa
- Realidade Aumentada (RA) e Realidade Virtual (RV)
- Simulación e Xemelgos Dixitais
- Fabricación Aditiva
- Industrial IoT (IIoT)
- Plataformas Cloud IoT. Ciberseguridade TO.
Este espazo ideado baixo as directrices das aulas de tecnoloxía aplicada (ATeCa) do Ministerio de Educación e FP dispón de distintos niveis de actuación:
- O aspecto físico da aula, que busca o confort das persoas usuarias, a monitorización, a sensórica e a creación de espazos para investigación, exposición, etc.
- O aspecto tecnolóxico, con características como a realidade virtual, ampliada e mixta; a conectividade Wifi6, etc.
Ademais entre a formación que se imparte no CIFP Politécnico tamén destacan os cursos de especialización en:
Ciberseguridade en contornas das tecnoloxías de operación
Pertence á familia profesional de Electricidade e electrónica e nel o alumnado aprenderá a definir e pór en práctica estratexias de seguridade nas organizacións e nas infraestruturas industriais, mediante a realización de diagnósticos de ciberseguridade e a identificación de vulnerabilidades, así como a execución das medidas necesarias para as arranxar, aplicando a normativa e os estándares do sector, protocolos de calidade, de prevención de riscos laborais e de respecto ambiental.
Fabricación aditiva
Pertence á familia profesional de Fabricación mecánica, sumándose ao ciclo medio de mecanizado e aos superiores de Programación da produción en fabricación mecánica, e o Ciclo Suprior de Construcións Metálicas (1º) na Formación Profesional Dual.
Quen realice este curso de especialización aprenderá a desenvolver e xestionar proxectos de fabricación aditiva mediante o uso de impresión 3D, supervisar ou executar a montaxe, mantemento e posta en marcha dos devanditos proxectos, así como tomar decisións de implementación no desenvolvemento de produtos de empresa.
Así mesmo, outros ciclos cunha grande inserción laboral son:
CM Instalacións Eléctricas e Automáticas
Este ciclo medio achega ao alumnado as competencias para montar e manter infraestruturas de telecomunicación en edificios, instalacións eléctricas de baixa tensión, máquinas eléctricas e sistemas automatizados, aplicando normativa e regulamentación vixente, protocolos de calidade, seguridade e riscos laborais, asegurando o seu funcionamento e respecto ao medio ambiente.
Estes profesionais exercen súa actividade en pemes, maioritariamente privadas, de montaxe e mantemento de infraestruturas de comunicación en edificios, máquinas eléctricas, sistemas automatizados, instalacións eléctricas de baixa tensión e sistemas domóticos por conta propia ou allea.
CM Instalación de Telecomunicacións
Achega ao alumnado os recursos e medios para a execución da montaxe ou mantemento das instalacións e equipos, capacitando para reformular a instalación de acordo á documentación técnica, resolver problemas e informar doutras continxencias, para asegurar a viabilidade da montaxe.
Así mesmo poderán montar ou ampliar equipos informáticos e periféricos, configurándoos, asegurando e verificando o seu funcionamento, en condicións de calidade e seguridadea ademais de poder instalar e configurar software base, sistemas operativos e aplicacións, e montar elementos compoñentes de infraestruturas e instalacións, desde canalizacións a cableado, armarios ou soportes, así como cámaras, procesadores de sinal ou centrais, entre outros, utilizando ferramentas de programación.
CM Mecanizado
Estes profesionais aprenderán a determinar procesos de mecanizado partindo de información técnica; preparar máquinas e sistemas; programar máquinas ferramentas de control numérico, robots e manipuladores; operar máquinas ferramentas de arranque de labra, de conformado e especiais para obter elementos mecánicos. Así mesmo poderán verificar produtos mecanizados e realizar un mantemento de primeiro nivel en máquinas e equipos.
CM de Carpintaría e Moble na modalidade de adultos
Este ciclo dota ao alumnado de coñecementos para fabricar elementos de carpintaría e mobles, realizando os procesos de mecanizado, montaxe, acabado, almacenamento e expedición de produtos, con saídas laborais en industrias dedicadas á fabricación e á montaxe de mobiliario e elementos de carpintaría, e na aplicación de produtos de acabado.
FP Dual
Retómanse ademais dentro da FP Dual o CM de Construción (primeiro) e os superiores de Proxectos de Edificación (primeiro) e Construcións Metálicas (primeiro).
Continúase ademais co ciclo medio de Elaboración de Produtos Alimentarios e co CM de Atención a Persoas en Situación de Dependencia.
CM de Elaboración de Produtos Alimentarios
O Ciclo Medio de Elaboración de Produtos Alimentarios, pola súa banda, pertence á familia formativa de Industrias Alimentarias. A competencia xeral deste título consiste en elaborar e envasar produtos alimentarios de acordo cos plans de produción e calidade, así como efectuar o mantemento dos equipamentos aplicando a lexislación de hixiene e seguridade alimentaria, protección ambiental e prevención de riscos laborais.
A actividade desenvólvese en áreas funcionais de recepción de materias primas e materiais, preparación e manexo de equipamentos de produción, control de operacións de elaboración, envasamento e embalaxe, apoio ao control de calidade e almacenamento e expedición de produtos acabados.
O centro decano da FP en Lugo segue a rexistrar un incremento de matrículas ano tras ano
Oferta formativa neste curso 2022-2023
A oferta formativa no CIFP Politécnico na familia profesional de Sanidade inclúe os ciclos medios de Farmacia e Parafarmacia, Coidados Auxiliares de Enfermaría, e aos superiores de Próteses Dentais, Laboratorio Clínico e Biomédico, e Hixiene Bucodental.
No réxime ordinario o centro lucense imparte as familias formativas de actividades físicas e deportivas, Edificación e Obra Civil, Electricidade e Electrónica; Fabricación Mecánica; Industrias Alimentarias; Madeira, Moble e Cortiza; Sanidade, e Servizos Socioculturais e á Comunidade. No réxime de persoas adultas impártense os ciclos medios de Farmacia e Parafarmacia; Coidados Auxiliares de Enfermaría; Emerxencias Sanitarias; Instalacións Eléctricas e Automáticas; Carpintaría e Moble, e Atención a Persoas en Situación de Dependencia, todos eles con formación en centros de traballo; así como o ciclo superior de Educación Infantil (oferta completa).
O progresivo incremento de alumnos e alumnas rexistrado nos últimos cursos é un dos mellores indicativos da calidade da ensinanza do centro decano da FP en Lugo.
▶ CMELE01 Instalacións Eléctricas e Automáticas
▶ CMELE02 Instalacións de Telecomunicacións
▶ CMFME01 Mecanizado
▶ CMSAMN02 Farmacia e Parafarmacia
▶ CMSSC01 Atención a Persoas en Situación de Dependencia
Ciclos Superiores
▶ CSAFD01 Ensinanza e Animación Sociodeportiva (plurilingüe)
▶ CSELE01 Sistemas Electrotécnicos e Automatizados
▶ CSELE02 Sistemas de Telecomunicación e Informáticos
▶ CSELE03 Automatización e Robótica Industrial
▶ CSFME01 Programación da Produción en Fabricación Mecánica
▶ CSINA02 Procesos e Calidade na Industria Alimentaria
▶ CSSAN02 Próteses Dentais
▶ CSSAN05 Laboratorio Clínico e Biomédico
▶ CSSAN09 Hixiene Bucodental (horario tarde)
▶ CSSSC01 Educación Infantil (bilingüe)
▶ CSSSC02 Integración Social (horario de tarde)
▶ ZMSSC01 Atención a Persoas en Situación de Dependencia
▶ ZMSAN01 Emerxencias Sanitarias (oferta completa)
▶ ZMELE01 Instalacións Eléctricas e Automáticas (oferta parcial)
▶ ZMMAM01 Carpintaría e Moble (oferta parcial)
Ciclo Superior
▶ ZSSSC01 Educación Infantil (oferta completa)
▶ CSFME50 Fabricación Aditiva
▶ ZSEOC01 Proxectos de Edificación (primeiro)
▶ ZSFME02 Construcións Metálicas (primeiro)
▶ ZMINA03 Elaboración de Produtos Alimentarios (primeiro sector lácteo)
▶ CBFME11 Fabricación e Montaxe
▶ CBMAM01 Carpintaría e Moble